Zëvendëskryeministri i Kosovës Besnik Bislimi tha se shqiptarët e Luginës së Preshevës vijojnë të përballen me një situatë të papranueshme diskriminimi sistematik, që sipas tij cenon të drejtat e tyre themelore.

Zëvendëskryeministri Besnik Bislimi tha se kërkesat e tyre për "respektimin e marrëveshjeve politike, ndalimin e pasivizimit të adresave, njohjen e diplomave të Kosovës dhe përfshirjen e drejtë në institucionet shtetërore" janë plotësisht legjitime dhe të drejta.

“Qeveria e Republikës së Kosovës mbështet bashkëkombasit tanë në Preshevë, Bujanoc dhe Medvegjë si dhe mbetet e angazhuar për të ngritur këto çështje në nivelet më të larta ndërkombëtare dhe të kërkojë përkrahje për t'i dhënë fund diskriminimit të padrejtë”, tha zëvendëskryeministri Besnik Bislimi.

Zgjidhja e këtyre çështjeve është dëshmi edhe për përkushtimin ndaj demokracisë dhe të drejtat e njeriut, e cila sipas Bislimit mungon nga fqinji verior, që në vazhdimësi shkel të drejtat e komunitetit shqiptar.

Ndërkohë protesta e shqiptarëve për identitet e dinjitet në Bujanoc ka përfunduar e qetë.

https://kosovapress.com/protesta-e-shqiptareve-per-identitet-e-dinjitet-ne-bujanoc-perfundon-e-qete