Eksperti i sigurisë kibernetike, Halil Berisha, ka reaguar pas lirimit të gjashtë serbëve të ndaluar në Jarinje, të cilët po transportonin materiale me përmbajtje nxitëse dhe nacionaliste, për të cilat KosovaPress raportoi sot gjatë ditës.

Në reagimin e tij ne Facebook, Berisha ngriti shqetësime për vendimin e Prokurorisë së Mitrovicës për lirimin e të dyshuarve vetëm pak orë pas arrestimit.

“Policia i arreston e Prokuroria i liron. Si është e mundur që, pavarësisht materialeve nxitëse dhe glorifikuese për sulmin në Banjskë, të dyshuarit të lirohen brenda pak orësh?”, ka shkruar ai.

Dyshime ka ngritur për rrezikun potencial të këtyre grupeve, derisa ka pyetur nëse institucionet kanë shqyrtuar mundësinë që këto aktivitete të lidhen me përgatitje për destabilizim apo incidente të reja.

“Çka nëse kemi të bëjmë me përgatitje për trazira të reja? A do të ketë përgjegjësi për këto vendime?”, ka shtuar ai.

Reagimi i plotë i tij:

Policia i arreston e Prokuroria e Mitrovicës i liron!

Materiale nxitëse, përçarëse e glorifikuese të terroristëve që sulmuan Kosovën në Banjskë e vranë Afrim Bunjakun iu kapën 6 serbëve në Jarinje duke i futë në Kosovë.

Si ka mundësi që prapëseprapë ata i liron Prokuroria e Mitrovicës brenda pak orëve!?

Si ka mundësi që nuk u trajtua dyshimi që këta serbë të lidhur me kriminel si Radoicic e Vladimir Radivojevic nuk po përgatisin grupe tjera për sulme të reja!?

Para pak kohe u zbulua se serb të lidhur me shërbimin rus në vende europiane si Gjermania e Franca bën aksione të tilla për nxitje fetare, mes hebrenjëve e myslimanëve!

Por as ky dyshim nuk u trajtua nga Prokuroria e Mitrovicës! Për pak orë ata u liruan!

Me çfarë baze?

A jep përgjegjësi dikush për këtë punë?

Çka nëse është plan edhe ndonjë trazirë?

/Kosovapress/