Një buall albino i quajtur me nofkën “Donald Trump”, për shkak të flokëve të tij të gjatë ngjyrë ari, do të theret në Bangladesh brenda disa ditësh.

Demi 680 kilogramësh, me një model flokësh biond si “comb-over”, është bërë një atraksion dhe merr vazhdimisht vizitorë kuriozë.

Zia Uddin Mridha, 38 vjeç, pronari i kafshës, tha se vëllai i tij e kishte emëruar buallin sipas Trump për shkak të “flokëve të tij të jashtëzakonshëm”.

Sipas The Telegraph, ai tha se njerëzit kanë shkuar me shumicë në fermën e tij në Narayanganj, pranë Dakas, gjatë gjithë muajit maj për ta parë kafshën, përcjell KosovaPress.

Një admirues, i cili kishte ardhur me pesë miq dhe të afërm, tha: “Me të vërtetë, tiparet janë të ngjashme mes buallit dhe presidentit Donald Trump. Nipin tim e solli një udhëtim njëorësh me varkë për ta parë Donald Trump-in”.

Por bualli do të theret, së bashku me rreth 12 milionë bagëti të tjera, ndërsa Bangladeshi përgatitet për festën myslimane të Kurban Bajramit më vonë këtë muaj.

“Do të më mungojë Donald Trumpi. Por ky është thelbi i Kurban Bajramit – bërja e një sakrifice”, tha Mridha, i cili është kujdesur për kafshën katërvjeçare gjatë vitit të fundit.