Kandidatja për deputete nga Lidhja Demokratike e Kosovës, Hykmete Bajrami, ka reaguar dy ditë pas zgjedhjeve, e cila tha se rezultati i zgjedhjeve është mesazh i qartë për klasën politike.

Ajo ka falënderuar qytetarët që votuan LDK-në, si dhe strukturat e partisë për angazhimin gjatë procesit zgjedhor.

“Qytetarët folën. Folën fort. Të zëshëm ishin edhe ata që nuk votuan fare. Mosdalja në votime është po ashtu një mesazh i qartë për secilin prej nesh. E lexoj këtë rezultat si protestë qytetare”, ka shkruar Bajrami.

Sipas saj, abstenimi është thirrje për reflektim dhe llogaridhënie për situatën politike në vend.

Bajrami ka thënë se qytetarët ndëshkuan partinë që kishte 51 për qind të votave, por njëkohësisht edhe LDK-së i kanë dhënë mesazh se nevojitet më shumë punë, seriozitet dhe përkushtim.

“Përfundimisht, është koha të mendojmë përtej karrigeve. Lidhja Demokratike e Kosovës është më shumë se një palë zgjedhje, më shumë se një rezultat dhe më shumë se një episod politik, andaj duhet reflektim i thellë për t’u rikthyer më e fortë”, ka shkruar ajo.

Sipas rezultateve preliminare të KQZ-së, LDK ka fituar 17.60 për qind të votave.

/Kosovapress/