Përballja e parë gjysmëfinale mes Atlético Madrid dhe Arsenalit është mbyllur në baraspeshë 1-1, në një natë ku protagonistët kryesorë ishin goditjet nga pika e bardhë dhe ndërhyrjet e sistemit VAR.

Arsenal kaloi i pari në avantazh në fundin e pjesës së parë përmes Viktor Gyökeres, i cili u tregua i saktë pas një penalltie të shkaktuar nga Hancko. Megjithatë, madrilenët u rikthyen në lojë në minutën e 56-të, kur Julián Álvarez barazoi shifrat po nga penalltia, e cila u akordua vetëm pas rishikimit në VAR për një prekje të topit me dorë nga Ben White.

Pjesa e mbetur e takimit u karakterizua nga një tension i lartë dhe vendime dramatike të gjyqtarit Danny Makkelie. Antoine Griezmann humbi një rast të artë duke goditur shtyllën, ndërsa në minutën e 80-të, arbitri holandez anuloi një penallti të dytë për Arsenalin pasi u konsultua sërish me VAR-in. Përveç rezultatit të hapur, të dy trajnerët morën lajme shqetësuese nga kampi mjekësor, veçanërisht Diego Simeone, i cili u detyrua të zëvendësonte golashënuesin Álvarez për shkak të një lëndimi që dukej serioz.

Gjithçka mbetet e hapur për ndeshjen e kthimit në Londër, ku do të përcaktohet edhe finalisti i madh.

KosovaPress