Kepi i Gjelbër e shtyu Argjentinën deri në limit, duke e dërguar ndeshjen në kohën shtesë përpara se të humbiste përfundimisht 3-2. Edhe pse udhëtimi i tyre në Kupën e Botës përfundoi aty, mënyra e guximshme me të cilën luajtën fitoi respekt të gjerë, përfshirë edhe nga Lionel Messi, i cili rezultoi vendimtar në ndeshjen eliminatore.

Ishte një ndeshje e jashtëzakonshme në të cilën Lionel Messi e udhëhoqi përsëri Argjentinën nga sulmi, duke shënuar një herë dhe duke luajtur një rol kyç në dy golat e tjerë. Në anën tjetër, Vozinha bëri gjithçka që mundi për ta mbajtur gjallë ëndrrën e Kepit të Gjelbër, duke realizuar një tjetër paraqitje të jashtëzakonshme me tetë pritje. Pavarësisht përpjekjeve të tij, kampionët në fuqi gjetën një mënyrë për të marrë një fitore të luftuar me vështirësi.

Ndërkohë, pas fishkëllimës së fundit, dy veteranët ndanë një përqafim të ngrohtë në një moment respekti të ndërsjellë. Njëri e kishte kaluar natën duke ndaluar gola, tjetri duke i krijuar dhe duke i shënuar, në fund të dy u larguan nga fusha duke shtuar një tjetër kapitull të paharrueshëm në udhëtimin e tyre në Kupën e Botës.

Duke folur pas ndeshjes, Vozinha zbuloi se çfarë i tha Messi kur të dy u takuan pas fitores së vështirë të Argjentinës.

“Shkova te Messi pas ndeshjes. Ai më përqafoi dhe më tha: ‘Je i shkëlqyer. Njerëzit e tu duhet të jenë krenarë për ty’. Kjo ishte e pabesueshme për mua”, tha Vozinha.

Portieri veteran theksoi se gjesti i Messit ishte një nga momente më të paharrueshme të karrierës së tij. Ai deklaroi më tej se pasi e falënderoi kapitenin argjentinas për fjalët e tij të mira, pyeti nëse mund të shkëmbenin fanellat pas ndeshjes.

“Të dëgjoj fjalë të tilla nga dikush si Leo Messi do të thotë shumë për mua. E falënderova dhe i thashë: ‘Faleminderit, Leo. Je më i miri’. Pastaj e pyeta nëse mund të shkëmbenim fanella. Leo tha se do të ma jepte në tunel pas intervistave. Momente të tilla mbeten të gdhendura në zemrën tënde përgjithmonë”, shtoi ai.

Argjentina përfundimisht fitoi 3-2 pas kohës shtesë, por vetëm pasi u shty në limit nga debutuesit e Kupës së Botës, Kepi i Gjelbër, shfaqja e guximshme e të cilëve i mbajti kampionët në fuqi nën presion deri në fishkëllimën e fundit.

KosovaPress