Policia e Durrësit ka ekzekutuar masën e sigurisë “Arrest në burg” ndaj dy shtetasve të dyshuar për vrasjen e një 45-vjeçari në Shijak, ngjarje e ndodhur në janar të këtij viti.

Sipas njoftimit të Drejtorisë Vendore të Policisë Durrës, specialistët e Seksionit për Hetimin e Krimeve të Rënda kanë arrestuar shtetasit I. F., 38 vjeç dhe D. F., 36 vjeç, kushërinj me njëri-tjetrin dhe banues në Shijak.

Të dyshuarit ishin shpallur në kërkim, pasi nga hetimet rezulton se më 27 janar 2026, pas një konflikti për motive të dobëta me shtetasin D. Ç., 45 vjeç, e kanë qëlluar atë me armë zjarri.

Si pasojë e plagëve të marra, 45-vjeçari humbi jetën disa ditë më vonë në spital.

Ndaj dy të arrestuarve, Gjykata e Shkallës së Parë e Juridiksionit të Përgjithshëm Durrës kishte caktuar masën e sigurisë “Arrest në burg” për veprat penale “Vrasja me dashje”, kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe municionit”.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.