Dy persona, të dy 26 vjeç, janë arrestuar të martën rreth orës 22 e 20 në Prishtinë, nën dyshimin se kanë kryer grabitje me armë të ftohtë ndaj tre shtetasve të huaj, në kryeqytet.

Sipas njoftimit të Policisë, dy të kapurit, nën kërcënimin e thikës, dyshohet se më herët ua kanë grabitur dy femrave shtetase të Brazilit dhe një mashkulli shtetas të Rumanisë, dy telefona celularë, 1.500 euro para të gatshme dhe disa bizhuteri.

Pasi e kishin kryer këtë vepër, ata kishin ikur, por, siç thonë nga policia, falë veprimeve intensive hetimore të Sektorit të Hetimeve të Kryeqytetit, në bashkëpunim me njësitë e Stacionit Policor Jugu, autorët e dyshuar janë identifikuar dhe arrestuar brenda një kohe të shkurtër.

Të arrestuarit janë N.K. A.K., 26 vjeç, të dy shtetas të Republikës së Kosovës.

Gjatë arrestimit, policia ka sekuestruar dy telefonat e grabitur, bizhuteritë, një pjesë të parave të vjedhura, si dhe dy thika që dyshohet se janë përdorur gjatë kryerjes së grabitjes.

Me vendim të prokurorit të shtetit, pas intervistimit, të dyshuarit janë dërguar në mbajtje për 48 orë, ndërsa hetimet për zbardhjen e plotë të rastit janë duke vazhduar.

/Kosovapress/