Kryeministri i Kosovës, Albin Kurti, ka thënë se krimi i organizuar në veri me mbështetjen financiare dhe logjistike nga Beogradi zyrtar, po e sulmon shtetin e Kosovës.

Pas mbledhjes së Këshillit të Sigurisë, Kurti tha se vrasja e policit, Afrim Bunjaku, është akt i rëndë mbi vendin, derisa theksoi se sulmet mbi Policinë e Kosovës, janë duke vazhduar nga një grup prej tridhjetë personave të armatosur në Banjskë të Zveçanit.

Ai sqaroi në detaje sulmin e rëndë ndaj zyrtarëve policor në mëngjesin e sotëm, që la të vrarë një polic dhe dy të plagosur. 

Në konferencë për medie të dielën, Kurti publikoi disa fotografi ku dëshmohet lëvizja e grupit kriminal të armatosur rreth e rrotull Manastirit në Banjskë të Zvecanit.

Ai iu bëri thirrje atyre që të dorëzohen tek organet kosovare të sigurisë.

Ndërkaq, zëvendësdrejtori i Policisë së Kosovës, Fehmi Hoti, tha aktualisht nuk ka informacione zyrtare se nga shkëmbimi i zjarrit që po ndodh në Banjskë ka të lënduar të tjerë.

Ai shtoi se për këtë rast janë në koordinim të vazhdueshëm më KFOR-in.

I pyetur nga gazetarët, Kurti tha se nuk ka informacion se si kanë hyrë në Kosovë ky grup kriminal, teksa shtoi se kufiri me Serbinë në Leposaviq është i gjatë dhe kryesisht zonë malore.

Ai foli edhe për Manastirin në Banjskë, ku tha se nuk ka dijeni se çka ka brenda tij, mirëpo fakti që ky grup kriminal ndodhet brenda tij e ka bërë Policinë e Kosovës që të jenë më e kujdesshme.

Në anën tjetër, zëvendësdrejtori Hoti tha se nuk ka informacione se ky grup i armatosur në Banjskë të Zveçanit i takon grupit Ëagner.

Ndërkaq, kryeministri Kurti tha se për këtë rast ka qenë në kontakt me ambasadorin amerikan në Kosovë, Jeffrey Hovenier dhe se do të kontaktojë me ambasadorin e BE-së në Kosovë, Tomas Szunyog./KosovaPress/

/Kosovapress/