Konsiderohet si “Mbretëresha e sporteve”, por atletika është sporti që nuk e ka asnjë stadium të dedikuar për këtë disiplinë. Edhe pse i lënë krejtësisht pas dore si sport, në Lojërat Olimpike të mbajtura vitin e kaluar në Paris, Kosova u përfaqësua nga dy atletë, Gresa Bakraqi dhe Grevist Bytyçi.
Suksese të tilla ngrenë alarmin për investim në infrastrukturën e këtij sporti pasi Kosova ka mbetur pa shteg të atletikës që nga vitit i largët 1991.
Kryetari i Federatës së Atletikës, Halil Sylejmani thotë se problemi me mungesën e infrastrukturës ia ka pamundësuar Kosovës që të organizojë ndonjë ngjarje sportive në nivel ndërkombëtar në këtë disiplinë.
Atletja Gresa Bakraqi thotë se është penalizuar direkt në rezultatet e saj për shkak të mungesës së kushteve për stërvitje në Kosovë. Ajo tregon se si detyrohet të kërkojë shtigje të atletikës për stërvitje në shtetet tjera.
Për trajnerin e atletikës, Adrian Mazreku, i cili mundësoi me punën e tij që Grevist Bytyçi ta përfaqësonte Kosovën në Lojërat Paralimpike në sportin e atletikës në Paris vitin e kaluar, është e pakuptueshme që një shtet i tërë të mos e ketë së paku një shteg të atletikës.
Por, një fije drite në fund të tunelit duket se po shihet edhe për këtë sport.
Të gjithë sportistët që merren me atletikë në Kosovë, stërvitjet e tyre i zhvillojnë në stadiumin “Liman Gegaj” në Malishevë, i cili ka vetëm pesë shtigje të atletikës.
