Tetë vjet pas ndarjes nga jeta të legjendës së futbollit kosovar, Fadil Vokrri, kujtimi për ish-kryetarin e Federatës së Futbollit të Kosovës vazhdon të mbetet i gjallë te komuniteti sportiv dhe opinionit publik.

Në përvjetorin e tetë të vdekjes së tij, kryetari i Federatës së Futbollit të Kosovës, Agim Ademi, ka publikuar një mesazh përkujtues, duke e cilësuar Vokrrin si një figurë të pazëvendësueshme të futbollit dhe shtetndërtimit sportiv të Kosovës.

Ademi ka theksuar se Vokrri nuk ishte vetëm një futbollist i madh, por edhe njeriu që udhëhoqi futbollin kosovar drejt njohjes ndërkombëtare, duke bërë realitet anëtarësimin e Kosovës në UEFA dhe FIFA.

“Ka emra që nuk i përkasin vetëm historisë, por bëhen pjesë e identitetit të një kombi. E një emër i tillë është padyshim Fadil Vokrri. Sot, tetë vjet më vonë, kujtimi për të mbetet po aq i fortë sa dita kur na la”, ka shkruar Ademi.

Sipas tij, trashëgimia e Vokrrit vazhdon të jetë frymëzim për brezat e rinj, ndërsa numri 9 që ai mbajti me krenari gjatë karrierës së tij mbetet simbol i suksesit, lidershipit dhe përkushtimit ndaj futbollit të Kosovës.

“Fadil Vokrri mbetet më shumë se një emër në historinë e futbollit tonë. Ai është frymëzim, krenari dhe pjesë e përhershme e identitetit të futbollit të Kosovës”, ka përfunduar Ademi në mesazhin e tij përkujtues.

KosovaPress