Kryetari i Lidhjes Demokratike të Kosovës, Lumir Abdixhiku, ka reaguar pas vendimit të Degës së LDK-së në Podujevë për nominimin e kandidatëve për deputetë, duke vlerësuar unitetin dhe përgjegjësinë e treguar nga struktura lokale e partisë.

Abdixhiku ka falënderuar Degën e Podujevës për, siç ka thënë ai, “unitetin, pjekurinë dhe përgjegjësinë” në këtë moment që e ka cilësuar si të rëndësishëm për bashkimin e LDK-së.

Sipas tij, nominimi i ish-kryetarit të degës, Agim Veliu, përfaqëson dëgjimin e vullnetit të anëtarësisë dhe një hap pozitiv drejt forcimit të unitetit brenda partisë.

“Nominimi nga dega i ish-kryetarit të saj, Agim Veliut, është dëgjim i vullnetit të anëtarësisë dhe një hap i mbarë në ndërtimin e bashkimit të madh për të cilin jemi angazhuar të gjithë”, shkruan Abdixhiku.

Ai ka theksuar se LDK-ja është më e fortë kur është e bashkuar, duke shtuar se ky është mesazhi më i mirë që mund t’u përcillet qytetarëve.

“LDK-ja gjithmonë ka ditur të bëhet më e fortë atëherë kur ka ditur të bëhet bashkë. Dhe ky është mesazhi më i mirë që mund t’u japim sot qytetarëve tanë; se mbi çdo dallim, mbi çdo pakënaqësi e mbi çdo periudhë të kaluar, qëndron shtëpia jonë e përbashkët politike, Lidhja Demokratike; dhe përgjegjësia jonë ndaj Republikës”, shkroi ai.

Në dy palë zgjedhjet e fundit parlamentare, LDK-ja nuk e kishte propozuar Veliun kandidat për deputet.

Veliu ka qenë kryetar komune në Podujevë, ish-ministër në qeveritë e kaluara, ish-deputet i LDK-së dhe ish-kryetar i degës së kësaj partie në Podujevë. Zgjedhjet e jashtëzakonshme parlamentare mbahen më 7 qershor.

/Kosovapress/