Kryetari i Lidhjes Demokratike të Kosovës, Lumir Abdixhiku ka ftuar Prokurorinë e Kosovës të hetojë vonesën në mirëmbajtjen e Bllokut A5 në KEK, por edhe ka ftuar Qeverinë e Kosovës, të cilën e ka quajtur të papërgjegjshme që të zgjohet nga gjumi i thellë veror e të bëjë çdo përgatitje të nevojshme për një dimër të vështirë për energjinë, duke nisur me shkarkime të bordeve partiake në KEK e ZRrE që me paaftësi po krijojnë terr në verë.

Abdixhiku ka shkruar në Facebook se Kosova nuk ka rrymë sot sepse Blloku A5 i KEK-ut, që prodhon plot 13% të rrymës në Kosovë, nuk ka kryer mirëmbajtjen e rregullt e të paraparë me kohë, prandaj tash e një muaj nuk është në funksion.

“Një muaj as mirëmbajtje e as prodhim. Dhe do të qëndrojë kështu për shumë kohë sepse Qeveria e Kosovës, sikurse në çdo temë tjetër, është e vonuar të veprojë. Verës pushon, dimrit nisë të mirëmbajë - këso praktike të mbrapshtë nuk njeh asnjë shtet. Sot, nga 130 MËh në orë, apo 78,000 euro për orë (në pikun energjetik), i humbasim si pasojë e kësaj vonese skandaloze. Madje, gjatë muajve në vijim, kur çmimi i energjisë rritet edhe më shumë, vlera e humbur do të jetë shumë më e lartë se kjo. Kemi kapacitete por s’i kemi në punë. Kjo është e vërteta e reduktimeve të rrymës në verë. Përtej neglizhencës së praktikantëve, nuk mund të mendojë asgjë tjetër, veçse një interes madhor që përfiton miliona euro nga tenderet riparuese e nga blerja e energjisë derisa ne nuk prodhojmë”, ka shkruar ai.

Përndryshe, Kosova është i vetmi vend në rajon ku kanë nisur reduktimet e energjisë elektrike.