Kryeministri në detyrë, Albin Kurti, në përvjetorin e 27-të të Masakrës së Dubravës tha se kjo masakrës është një ndër plagët më të rënda gjatë luftës në Kosovë.

Kurti tha se Dubrava ishte pjesë e mekanizmave dhe represionit shtetëror serb të përdorur kundër shqiptarëve të Kosovës, që gjatë luftës u shndërrua në poligon pushkatimi.

Kurti tha se dëshmitë e atyre ditëve janë rrëqethëse, e njëjtë u shpreh se janë edhe aktet heroike të të burgosurve që u vinin në ndihmë shokëve të tyre, e mbi të gjitha kur, siç shtoi ai, të gjallët qëndronin në të njëjtin vend me shokët e tyre të vrarë.

E pranishme në ceremoninë përkujtimore të Masakrës së Dubravës ishte edhe ushtruesja e detyrës së presidentes, Albulena Haxhiu, e cila iu “përgjigj” Shkëlzen Gashit, duke thënë se kjo masakrës u krye nën administrimin e shtetit serb mbi njerëz të çarmatosur, të mbyllur dhe krejt të pambrojtur.

Më tej, ajo u shpreh se Dubrava nuk mjafton të përmendet vetëm si datë, por tha se duhet kujtuar si dëshmi për krimet monstruoze që Serbia i ka bërë në Kosovë.

Kurse, kritika për ekspozitën e bujshme të Shkëlzen Gashit, të titulluar “Masakrat në Kosovë 1998-99”, që paraqiste të dhëna gabim për Masakrën e Dubravës, pati i mbijetuari i kësaj masakre, Nait Hasani.

Hasani tha se si dëshmitar i kësaj masakre, ky përvjetor është më i rëndë, pikërisht pasi në sheshin “Nënë Tereza” në Prishtinë, gjatë marsit u shfaq ekspozita, që sipas tij, ishte si versioni i UDB-së para 27 viteve për Masakrën e Dubravës.

E i mbijetuari tjetër i kësaj masakre, Enver Dugolli, në fjalën e tij, tregonte se si të burgosurit këndonin këngë për ta mbajtur lartë moralin.

Ai tha këto këngë i mbanin gjallë, e i udhëhiqnin drejt jetës e lirisë, teksa shokët e rënë i kujtonin me këngë pasi s’kishin më tepër.

Masakra e Burgut të Dubravës është kryer prej 19 deri më 24 maj të vitit 1999.