Me ceremoninë solemne të ndarjes së medaljeve dhe çmimeve individuale është mbyllur BVA U17 Kampionati Ballkanik i Volejbollit për Vajza, i cili për pesë ditë me radhë solli në Ferizaj garë cilësore dhe rivalitet mes përfaqësueseve të rajonit.

Përfaqësuesja e Turqisë u shpall kampione e këtij edicioni, pasi dominoi turneun dhe e përfundoi garën në vendin e parë, duke merituar medaljet e arta. Vendin e dytë e zuri Mali i Zi, i cili u stolis me medaljet e argjendta, ndërsa Bullgaria e mbylli kampionatin në pozitën e tretë dhe fitoi medaljet e bronzta.

Medaljet e bronzta për Bullgarinë u dorëzuan nga nënkryetari i Federatës së Volejbollit të Kosovës, Valon Xhafaj, dhe supervizori i BVA-së, Filip Despotovski. Medaljet e argjendta për Malin e Zi u ndanë po nga Valon Xhafaj dhe Filip Despotovski, ndërsa medaljet e arta për Turqinë u dorëzuan nga sekretari i përgjithshëm i Federatës së Volejbollit të Kosovës, Valon Nikqi, dhe drejtori i Urbanizmit në Komunën e Ferizajt, Arbër Bytyqi.

Në ceremoninë përmbyllëse u ndanë edhe çmimet individuale për lojtaret më të spikatura të kampionatit.

Çmimi “Fair Play” i takoi volejbollistes së Kosovës, Njola Babuni. Liberoja më e mirë u shpall Magdalena Bogdanova nga Bullgaria, ndërsa bllokuesja më e mirë e mesit ishte Nejla Guzonjic nga Turqia.

Çmimi për sulmuesen më të mirë të jashtme iu nda Elena Jovanovicit nga Mali i Zi, ndërsa si “Opposite” më e mirë u vlerësua Cagla Caglayandere nga Turqia. Organizatorja më e mirë e lojës (setter) u shpall Nadja Pekovic nga Mali i Zi.

Titulli i lojtares më të vlefshme të turneut (MVP) i takoi Selis Ecrin Turkyasar nga Turqia, e cila u vlerësua për paraqitjet e saj gjatë gjithë kampionatit.

Organizatorët vlerësuan se kampionati u zhvillua me sukses, duke sjellë në Ferizaj volejboll cilësor, frymë sportive dhe bashkëpunim mes federatave të vendeve pjesëmarrëse, ndërsa ngjarja u mbyll me ceremoninë e ndarjes së medaljeve, trofeut të kampiones dhe çmimeve individuale.

KosovaPress