Trajneri i Manchester Cityt, Enzo Maresca, ka konfirmuar se mesfushori spanjoll Rodri do t’i nënshtrohet një ndërhyrjeje kirurgjikale të hënën, por ka hedhur poshtë spekulimet për një largim të mundshëm të tij nga klubi.

Në konferencën e tij të parë për media si trajner i Manchester Cityt, Maresca deklaroi se nuk është i shqetësuar nga zërat e merkatos dhe se pret që fituesi i Kupës së Botës të rikthehet në skuadër sapo të përfundojë procesin e rikuperimit.

“Së pari, duhet të them se rreth lojtarëve të mëdhenj gjithmonë ka spekulime, ndaj nuk jam i shqetësuar. Është normale, sidomos kur bëhet fjalë për një kampion bote dhe një nga lojtarët më të mirë në botë”, tha Maresca.

Ai konfirmoi se Rodri do t’i nënshtrohet një operacioni të vogël në shpinë, ndërsa pritet të mungojë në fillim të sezonit të ri të Premier League.

“Çdo trajner do të donte ta kishte Rodrin në ekip, sepse është një futbollist i jashtëzakonshëm. Tani ai do të operohet të hënën, ka nevojë për pushim dhe rikuperim, pastaj do të rikthehet te ne”, shtoi tekniku italian.

Rodri është përfolur për një largim nga Manchester City, pasi më herët kishte lënë të hapur mundësinë e një rikthimi në Madrid. Megjithatë, Maresca e bëri të qartë se mesfushori mbetet pjesë e planeve të tij.

Trajneri italian pranoi gjithashtu se Manchester City ka ende punë për të bërë në afatin kalimtar, por shmangu komentet lidhur me të ardhmen e Jack Grealish dhe James Trafford.

Duke folur për emërimin e tij në stolin e Cityt pas largimit të Pep Guardiolës, Maresca e cilësoi këtë një privilegj të madh.

“Është privilegj që klubi më ka besuar këtë detyrë. Pep Guardiola ka qenë trajneri më i mirë në botë në 20 apo 25 vitet e fundit. Ta pasosh atë është një sfidë e madhe, por edhe një nder”, deklaroi Maresca.

Ai gjithashtu shprehu vlerësime për ish-trajnerin anglez Kevin Keegan, ndërsa theksoi se synimi i tij është të vazhdojë sukseset e Manchester Cityt në vitet e ardhshme.

KosovaPress