Ish-kryetari i Aleancës, Ramush Haradinaj, në një intervistë dhënë në emisionin “Këndi i Debatit” në Tëvë 1, ka folur për reformat e fundit brenda partisë dhe konsolidimin e plotë të strukturave drejtuese.

Haradinaj ka shprehur lehtësimin dhe krenarinë e tij për rrugëtimin e Aleancës, duke potencuar se kuvendi i kaluar zgjedhor ka sjellë në krye një figurë me vlera të larta politike si Ardian Gjini.

“Kam pas nderin me udhëheq Aleancën, me themelu edhe me udhëheq, kuvendi i kaluar zgjedhor ka zgjedh kryetarin e ri që është z. Ardian Gjini, një koleg vërtetë i çmuar, një politikan shumë në nivel politik dhe me shumë vlera. E kam një lehtësim të madh që Aleanca vazhdon edhe jo vetëm që vazhdon, po edhe është shpresë për qytetarët e vendit, për vendin, që vendi të zhvillohet të përparon, të kemi perspektivën tonë si popull,” ka thënë Haradinaj.

Ai shtoi se ndryshimet e brendshme ishin pjesë e një vizioni të qartë ideologjik.

 “Vërtetë jam i lehtësuar për shkak se jo vetëm që Aleanca tani ka kryetarin e ri, e kryesinë e organet e reja, por ka edhe një vizion që është shumë i avancuar, i një të djathtë vërtetë të avancuar që më jep vërtetë shpresë. Ka qenë koha me ndodh këto reforma, këto janë të gjitha vizion i kryetarit të ri, pra edhe unë besoj shumë se në këtë etapë që po hyjmë të re të Aleancës, kryetari i ri e ka marrë me shumë përgjegjësi detyrën e vet, e ndjen peshën e zhvillimeve në vend dhe po punon që Aleanca me qenë shpresa e të gjithë qytetarëve të vendit.”

I pyetur specifikisht për udhëheqjen aktuale, Haradinaj ka qenë i prerë duke konfirmuar se z. Gjini ka autoritet të plotë udhëheqës dhe statutor, ndërsa rolin e tij e ka cilësuar si këshillues, pa asnjë ndërhyrje ekzekutive.

“Është i plotfuqishëm në bazë të statutit dhe vendimeve, shihen vendimet, shihen zhvillimet. Ardiani është kryetar i Aleancës, mua më ka nderuar me një nder si Kryetar Nderi si themelues, që do ta kem mundësinë me dhënë këshilla me mbështet Aleancën, si do ta bëjmë të gjithë ne që jemi në Aleancë, po unë nuk mbaj funksione ekzekutive, të gjitha janë kompetencë e kryetarit,” u shpreh ai.

Haradinaj theksoi se respekti për institucionin e partisë dhe për Kosovën e obligon atë që të lejojë organet e reja të kryejnë punën e tyre në mënyrë të pavarur.

“Unë nuk kam fjalë në parti, partia e ka kryetarin, unë mund me dhanë mendim ose këshill, por jo fjalë si me vepru partia, si me u bë punët në parti. Aq shumë e respektoj Aleancën e aq shumë e dua Kosovën, sa dua një parti politike të vërtetë, organet udhëheqëse me i kry punët e veta.”

“Ka qenë kohë e ndjeshme, kemi marrë rrezik të madh, për fat të mirë rezultoi e qëlluar. Kryetari i ri u zgjedh veç dy javë para se të votohej, ai prapë arriti rezultat vërtetë të mirë, rritje, në një situatë politike jo të mirë. E çka është më e mira, është një trend ky i rritjes,” përfundoi Ramush Haradinaj.