Triumfi evropian është vetëm disa orë larg dhe sot historia do të shkruhet në Budapest. PSG synon titullin e dytë radhazi, ndërsa Arsenali shpreson të pushtojë Evropën pas një pritjeje 20-vjeçare.

Duke folur në konferencën për shtyp përpara finales së Ligës së Kampionëve kundër Arsenalit, superylli i PSG-së, Ousmane Dembele, foli për kundërshtarin, ambiciet dhe urinë e kampionëve në fuqi dhe dha një përditësim mbi shëndetin e tij.

“Arsenali është një ekip i shkëlqyer, i kemi parë duke fituar titullin e Premier Ligës dhe atë që na treguan në Ligën e Kampionëve. Ata meritojnë të jenë në finale. Ata luajnë futboll të shkëlqyer në të gjitha aspektet. Ata kanë edhe një trajner të jashtëzakonshëm” – tha ai.

Anësori francez tha se fitimi i Topit të Artë vitin e kaluar nuk e ndryshoi aspak ambicien e tij.

“Nuk ka ndryshuar mënyra se si luaj ose kush jam. Mendoj se thjesht kam më shumë përgjegjësi mbi supet e mia që kur erdha te PSG. Asgjë nuk ndryshoi me oreksin tim për fitore, unë ende dua të vesh trofe me ekipin tonë. Çmimet individuale i bënë njerëzit të flasin, por për mua, gjëja më e rëndësishme është të fitoj me PSG-në” – vazhdoi Dembele.

Ndërkohë, pati pak stres midis tifozëve të PSG-së pasi dëgjuan për dëmtimin e pulpës së këmbës së Dembele-s në fund të sezonit të ‘Ligue 1’, por vetë lojtari ishte i sigurt se do të ishte gati për Budapestin.

“Nuk kisha frikë se do të humbisja finalen, kisha 10-15 ditë për t’u përgatitur. Sezoni ishte mjaft i vështirë për të gjithë te PSG, nuk patëm shumë pushim. Por jemi 100% gati për të filluar” – ka thënë Dembele.

Kampionët në fuqi praktikisht nuk kishin asnjë përgatitje paraprake, pasi kaluan nga Kupa e Botës për Klube direkt në Superkupë dhe sezonin e ri.

“Po përpiqemi të jemi gati fizikisht, trajneri na dha shumë ditë pushimi. Ai dhe stafi i tij i kanë planifikuar me kujdes të gjitha ndeshjet. Por mua më pëlqen të luaj shumë ndeshje, kjo do të thotë se ia del mbanë” – shtoi Dembele.

Duke folur për trajnerin, Dembele beson se Luis Enrique është ndër më të mirët që e kanë stërvitur ndonjëherë.

“Ai më ka ndihmuar shumë të përparoj, me dhe pa top. Mundohem të zbatoj të gjitha këshillat taktike që më jep. Por jam gjithashtu i rrethuar nga lojtarë të jashtëzakonshëm, gjë që ma bën më të lehtë” – shpjegoi ai.

29-vjeçari foli për ambiciet e PSG-së që duan të përsërisin triumfin e tyre të vitit të kaluar.

“Ne gjithmonë duam të luajmë finalen e Ligës së Kampionëve. Ishte një kohë historike. Ne jemi një skuadër e re dhe shumë ambicioze. Të fitojmë nesër është e rëndësishme për ne dhe nëse do të mund ta arrinim, të fitojmë përsëri do të ishte historike. Jemi në një nivel të lartë, i shfrytëzojmë në maksimum këto momente. Kemi staf, lojtarë të jashtëzakonshëm, dëshirë për të fituar. E dimë që mund ta fitojmë Ligën e Kampionëve” – deklaroi ai.

Ndeshja do të zhvillohet në stadiumin “Puskas Arena”, në Budapest të Hungarisë, një arenë që do të presë për herë të parë një finale të Ligës së Kampionëve, e cila fillon nga ora 18:00.

KosovaPress