Robert Lewandowski njoftoi se do të largohet nga Barcelona në fund të sezonit 2025-26. Sulmuesi polak ka vendosur të mos qëndrojë në Spotify Camp Nou për 12 muaj të tjerë, që do të thotë se do të largohet kur kontrata e tij të skadojë në qershor.

Siç pritej, largimi i Lewandowski ishte tema kryesore e diskutimit në konferencën për shtyp të Hansi Flick, përpara ndeshjes të së dielës kundër Real Betis, e cila do të jetë e fundit për veteranin numër nëntë. Flick i bëri homazh një lojtari me të cilin ka punuar gjatë disa viteve në Bavari dhe Katalonjë.

“Biseda shkoi mirë. Të gjitha titujt e mi kanë qenë me të. Për mua, ka qenë një privilegj ta kem atë dhe të punoj me të. Ai është një profesionist i jashtëzakonshëm. Ai ka qenë gjithmonë në nivelin më të lartë, është kujdesur për trupin e tij. Nuk do ta harroj kurrë. Ai është një model për lojtarët e rinj. Mendoj se është mirë për të dhe ndoshta për klubin sepse kështu do ta ristrukturojmë ekipin. Dhe po, kemi folur paraprakisht. Ai e njoftoi në dhomën e zhveshjes. Ne të gjithë e dimë se çfarë lloj lojtari është” – tha Flick.

Ndërkohë Flick konfirmoi se Lewandowski do të luajë si titullar kundër Real Betis, ndërsa diskutoi gjithashtu nënshkrimin e zëvendësuesit të tij gjatë afatit kalimtar të verës.

“Nesër ai do të luajë si titullar sepse e meriton. Nuk e di çfarë do të ndodhë sezonin e ardhshëm. Do ta shohim tregun, por zëvendësuesi nuk është bërë ende. Kemi kohë. Nuk do të jetë e lehtë të gjejmë një lojtar të atij niveli. E kam thënë edhe më parë. Ai është një djalë i shkëlqyer, një profesionist spektakolar. Do të na mungojë, por do t'ia dalim. Do ta ristrukturojmë ekipin” – shtoi Flick.

Ndeshja mes Barcelonës dhe Real Betis do të zhvillohet më 17 maj, me fillim nga ora 21:15.

 KosovaPress