Manchester City ka mohuar kategorikisht raportimet e fundit nga Spanja që lidhnin sulmuesin Erling Haaland me një transferim të mundshëm te Real Madridi, duke i cilësuar ato si të pavërteta.

Reagimi i klubit anglez vjen pasi edhe përfaqësuesit e Haalandit kundërshtuan deklaratat e avokatit spanjoll Enrique Riquelme, i cili kishte pretenduar se ekzistonte mundësia e një kalimi të norvegjezit në Santiago Bernabeu.

Në një deklaratë zyrtare, Manchester City theksoi se nuk ekziston asnjë mundësi që një transferim i tillë të ndodhë dhe se nuk ka asnjë klauzolë kontraktuale që do ta lejonte largimin e sulmuesit drejt Real Madridit.

“Raportimet që kanë dalë nga Spanja në lidhje me të ardhmen e Erling Haaland janë të pavërteta. Nuk ka asnjë shans që kjo të ndodhë dhe nuk ekziston asnjë klauzolë kontraktuale që e mundëson një gjë të tillë”, thuhet në reagimin e klubit.

Kampioni i Anglisë gjithashtu bëri të ditur se po shqyrton mundësinë e ndërmarrjes së veprimeve ligjore për përdorimin e imazhit të lojtarit në këtë kontekst.

KosovaPress