Lojtari i Kombëtares së Sllovakisë, Matthew Cingel, nuk e fshehu emocionin pas triumfit historik të ekipit të tij në “Rugby Europe Sevens Conference 2”, të mbajtur në Kosovë, ku sllovakët u shpallën kampionë të turneut.

Pas finales, duke folur për KosovaPress, Cingel deklaroi se ky sukses përfaqëson kulmin e një rruge të gjatë dhe të vështirë, duke e cilësuar atë si një ëndërr të realizuar.

“Është një moment i jashtëzakonshëm për mua. Jam shumë i nderuar që përfaqësoj vendin tim dhe, kemi bërë aq shumë përpjekje në këtë, si i gjithë ekipi. Thjesht absolutisht e jashtëzakonshme. Jam shumë i lumtur, domethënë nuk mundesha, nuk mund të isha më krenar për ekipin dhe krenar për vendin tim”, tha ai.

Lojtari tregoi se ka qenë pjesë e këtij kompeticioni që nga mosha 17-vjeçare dhe se për vite me radhë Sllovakia kishte mbetur pranë suksesit të madh.

“Kam luajtur në këtë kompeticion që kur isha 17 vjeç. Jam rritur duke luajtur ragbi, në Sllovaki. Si të thuash, duke kaluar nëpër të gjitha kampet, nëpër të gjitha stërvitjet, nëpër gjithçka. Kemi dalë gjithmonë të dytët ose të tretët çdo vit dhe është pikërisht ajo, ajo gjëja e vogël që na ka munguar gjithmonë. Dhe që më në fund t’a arrinim, është sikur po jetoj një ëndërr”, u shpreh Cingel.

Përveç suksesit ekipor, Matthew Cingel u vlerësua edhe individualisht, duke u shpallur “Lojtari i Turneut” (Player of the Tournament) në “Rugby Europe Sevens Conference 2, Kosovo 2026”. Ky çmim iu dha pas paraqitjeve të shkëlqyera, qëndrueshmërisë dhe ndikimit të madh që pati gjatë gjithë garës.

Ndërkohë, duke folur për ekipin e Kosovës, Cingel pati fjalë vlerësuese për përfaqësuesen vendase dhe progresin që po shënon ragbia kosovare.

“Ekipi i Kosovës është i jashtëzakonshëm. E di që janë një shtet shumë i ri. Mund ta shoh të gjithë mundin që bëhet prapaskenave për si të thuash, të niset ragbi në Kosovë dhe ky ishte një turne shumë premtues për ta. Ata, ia dolën të mposhtin Greqinë, ajo ishte një ndeshje shumë mbresëlënëse dhe, ka patjetër diçka aty. Shumë, zhvillim për Kosovën dhe mund ta shoh që ata po rriten patjetër çdo vit”, deklaroi ai.

Sllovakia e mbylli turneun në mënyrën më të mirë të mundshme, duke ngritur trofeun e kampionit evropian, ndërsa Matthew Cingel u shndërrua në një nga figurat kryesore të suksesit të skuadrës së tij.

KosovaPress