Barcelona vazhdon t’i japë prioritet zhvillimit të talenteve të reja nën drejtimin e trajnerit Hansi Flick. Mes futbollistëve që kanë marrë një mundësi të rëndësishme këtë verë është edhe mesfushori 16-vjeçar Orian Goren, një nga premtimet më të mëdha të akademisë së famshme “La Masia”.

Sipas raportimeve të mediave spanjolle, Goren është ftuar të stërvitet me ekipin e parë gjatë fazës hapëse të përgatitjeve para sezonit të ri, duke u bërë një nga lojtarët më të rinj të përfshirë në skuadrën e parë. Vetëm Ebrima Tunkara, i lindur në vitin 2010, është më i ri se ai në këtë grup.

Goren, i lindur në vitin 2009, iu bashkua Barcelonës në vitin 2023 pasi u largua nga Maccabi Petah Tikva. Ai u transferua në Kataloni së bashku me familjen për të vazhduar zhvillimin e tij në akademinë “La Masia”.

Që nga ardhja në Barcelonë, mesfushori ka shënuar përparim të vazhdueshëm, duke u bërë pjesë e rëndësishme e ekipit Juvenil A nën drejtimin e Pol Planas, ndërsa ka fituar përvojë edhe në Ligën e të Rinjve të UEFA-s

Burime pranë klubit bëjnë të ditur se Barcelona e sheh Goren të gatshëm për një hap të ri në karrierë. Pritet që sezonin e ardhshëm ai të promovohet te Barça, ku synon të ketë rol të rëndësishëm pavarësisht moshës së re.

I vlerësuar për cilësitë teknike dhe inteligjencën taktike, Goren është një mesfushor i gjithanshëm. Ai mund të luajë si mesfushor i brendshëm, në rolin e mesfushorit mbrojtës, por edhe të zhvendoset në krah si një sulmues i tërhequr, duke i ofruar trajnerëve alternativa të shumta taktike.

KosovaPress