Boksieri shqiptar Ardian Krasniqi është nderuar nga autoritetet e qytetit gjerman Rottweil, duke u regjistruar në Librin e Artë të qytetit pas sukseseve të tij në arenën ndërkombëtare të boksit.

Kampioni i versionit WBO Intercontinental dhe kampioni i sapokurorëzuar i Evropës në versionin WBA u prit nga kryetari i bashkisë së Rottweil-it, Christian Ruf, me të cilin zhvilloi një takim zyrtar para ceremonisë së nënshkrimit.

Për 29-vjeçarin shqiptar, i cili ka fituar të gjitha 13 ndeshjet e tij në boksin profesionist, 12 prej tyre me nokaut, ky ishte një moment me rëndësi të veçantë në karrierën e tij.

“Nënshkrimi në Librin e Artë të qytetit do të thotë jashtëzakonisht shumë për mua. Është një nder i madh. Kam lindur dhe jam rritur në Rottweil. Këtu i njoh të gjitha rrugët dhe këtu kam festuar sukseset më të mëdha të karrierës sime. Do të jem gjithmonë besnik ndaj Rottweil-it dhe do ta përfaqësoj qytetin tim me krenari kudo në botë”, ka deklaruar Krasniqi.

Nga ana tjetër, kryebashkiaku Christian Ruf përgëzoi boksierin shqiptar për arritjet e tij, duke theksuar se Rottweil është krenar që ka një sportist të këtij niveli si ambasador të qytetit.

Ceremonia kishte edhe një domethënie të veçantë për familjen Krasniqi. Më 18 shkurt 2004, edhe xhaxhai i Ardianit, ish-kampioni i njohur i boksit Luan Krasniqi, ishte nderuar me nënshkrimin në Librin e Artë të Rottweil-it, pasi fitoi titullin e kampionit evropian ndaj turkut Sinan Şamil Sam.

Pas 22 vjetësh, Ardian Krasniqi vazhdoi traditën e familjes, duke u bërë anëtari i radhës që përfshihet në Librin e Artë të qytetit falë sukseseve të tij në boksin profesionist.

Rottweil, qyteti më i vjetër i landit Baden-Württemberg, njihet për traditën e tij sportive, ndërsa familja Krasniqi prej vitesh ka kontribuar në promovimin e tij në arenën ndërkombëtare të boksit.

KosovaPress