Zyra e Rregullatorit të Energjisë në Kosovë (ZRRE) bën të ditur se rritja mesatare e tarifave për të gjitha kategoritë e konsumatorëve bazuar në të Hyrat e Lejuara Maksimale është rreth 16%, raporton KosovaPress. ZRRE të premten i ka miratuar kërkesat e tre operatorëve energjetikë(KEDS, KESCO dhe KOSTT) për të hyrat e lejuara maksimale. ZRRE njoftimin për shtrenjtimin e tarifave e bëri pas mbledhjes së Bordit, nëpërmjet një njoftimi.
Rregullatori i energjisë propozoi muajin e kaluar shtrenjtimin e çmimit të energjisë elektrike në vend për rreth 15 për qind, duke thënë se rritja e tarifave këtë vit është e domosdoshme, për shkak të uljes së prodhimit të energjisë, rritjes së konsumit dhe varësisë së madhe nga importet me çmime të larta, raporton KosovaPress.
Të hyrat maksimale për Kompaninë Kosovare për Furnizim me Energji Elektrike [KESCO] janë 435 milionë euro, përkundër që kërkesa e tyre fillestare ishte 447 milionë euro. Ndërkaq, ZRrE vendosi që të hyrat maksimale për Kompaninë për Distribuim të Energjisë Elektrike në Kosovë [KEDS] për vitin 2025 të jenë 180 milionë euro, ani pse kërkesa e tyre ishte 220 milionë euro. Në anën tjetër, të hyrat maksimale për Operatorin e Sistemit, Transmisionit dhe Tregut [KOSTT] u vendos të jetë 88 milionë përkundër që kërkesa e tyre ishte 101 milionë euro.
Në lidhje me këto, kryesuesi i Bordit të ZRrE-së, Ymer Fejzullahu, tha se pas vlerësimit nga stafi i tyre dhe raporteve konsultative kanë arritur që të zbresin të hyrat e lejuara maksimale për këta operatorë.
Megjithatë, ai në mledhje nuk pranoi të jep një përqindje të saktë për rritjen e energjisë elektrike në vitin 2025, përkundër insistimit të madh të mediave.
Madje ishte i ashpër ndaj mediave duke iu kërkuar që të largohen nga mbledhja e bordit të ZRrE-së.
Ndërkaq, drejtori menaxhues i ZRrE-së, Petrit Pepaj, tregoi shkaktarët që sipas tij po rritet kostoja e shërbimit të energjisë elektrike.
Pavarësisht insistimit të gazetarëve në lidhje me përqindjen e rritjes së çmimit të energjisë, Pepaj nuk pranoi pyetjet të gazetarëve.
“S’ka pyetje. Ju përgjigjemi me shkrim”, tha ai, shkruan KosovaPress.
Madje në një moment, kryesuesi i bordit të ZRrE-së, Ymer Fejzullahu, kërkoi nga mediat të largohen nga mbledhja e bordit, derisa nuk pranoi asnjë pyetje nga gazetarët.
“I kisha lutur të gjitha mediat me na mirëkuptua, pasi kalojmë në seancë të mbyllur dhe vazhdojmë me pika të tjera të rendit të ditës....”, tha ai.
Më vonë, ZRRE nëpërmjet një njoftimi, pas mbledhjes së Bordit, tha se: "Rritja mesatare e tarifave për të gjitha kategoritë e konsumatorëve bazuar në të Hyrat e Lejuara Maksimale është rreth 16%"
Rregullatori i energjisë propozoi muajin e kaluar shtrenjtimin e çmimit të energjisë elektrike në vend për rreth 15 për qind.
Shtrenjtimi i energjisë elektrike, ka shkaktuar reagime të shumta nga bizneset, subjektet politike dhe qytetarët, madje kishte edhe protesta.
Dhoma e Tregtisë dhe Industrisë i ka bërë thirrje sërish ZRrE-së që të mos shtrenjtojë energjinë elektrike. Në ditën kur Zyra e Rregullatorit të Energjisë mbajti mbledhjen për të vendosur për këtë çështje, drejtori i Dhomës së Tregtisë dhe Industrisë, Kushtrim Ahmeti tha se rritja e çmimit të energjisë elektrike në këtë kohë rrezikon vendet e punës. Veç tjerash, u ngrit shqetësimi edhe për procesin e shpejtë të liberalizimit të tregut të energjisë në Kosovë, për çka u kërkua që parlamenti të merret me këtë çështje.
Bizneset dhe qytetarët, u tha në konferencë për media, se nuk duhet të paguajnë dështimet e institucioneve.
