Presidenti i Ukrainës, Volodymyr Zelensky, ka deklaruar se përpjekjet për t’i dhënë fund luftës në Ukrainë nuk mund të shtyhen derisa të përfundojë konflikti në Iran, duke e cilësuar këtë qasje si një “rrezik të madh”.

Në një intervistë për CNN, Zelensky theksoi se, ndonëse bisedimet teknike me SHBA-të vazhdojnë, ai nuk sheh mundësi për takime të nivelit të lartë derisa të zgjidhet çështja e Iranit. Ai shtoi se është sfiduese që i njëjti ekip amerikan, i udhëhequr nga Steve Witkoff dhe Jared Kushner, po merret njëkohësisht me të dy konfliktet.

Zelensky paralajmëroi se Ukraina nuk duhet të lihet “për më vonë”, duke theksuar se vendi i tij ndodhet tashmë në një krizë të thellë dhe kërkon vëmendje të menjëhershme ndërkombëtare.

Ai shtoi se lufta në Iran ka ndikuar edhe në furnizimet me armë për Ukrainën, veçanërisht në mungesën e raketave antibalistike për shkak të kapaciteteve të kufizuara të prodhimit në SHBA.

Duke folur vetëm disa orë pasi Bashkimi Evropian miratoi paraprakisht një kredi prej 90 miliardë eurosh për Kievin, Zelensky e quajti këtë financim një çështje “jete dhe mbijetese”.

Sipas tij, mungesa e fondeve po kufizon prodhimin e armëve, pavarësisht kapaciteteve ekzistuese.

Ai dha shembullin e prodhimit të interceptorëve të dronëve, duke thënë se Ukraina aktualisht prodhon rreth 1,000 njësi në ditë, ndërsa kapaciteti është dyfish më i lartë, por mungesa e financimit pengon rritjen e prodhimit.

Kredia e BE-së u zhbllokua pas rifillimit të rrjedhës së naftës përmes tubacionit Druzhba dhe pas ndryshimeve politike në Hungari, ku ish-kryeministri Viktor Orbán kishte bllokuar më parë marrëveshjen.

/Kosovapress/