Mes dinosaurëve më të njohur në këtë muze në Bangkok, qëndron edhe një i ri.

Ky është Nagatitan chaiyaphumensis dhe ai – ose ajo – është shumë, shumë i madh. Kjo specie e re gjigante e dinosaurit,  e zbuluar në Tajlandë, mendohet të jetë më e madhja e gjetur ndonjëherë në Azinë Juglindore.

Me një gjatësi prej 27 metrash, ai është afërsisht sa dy autobusë londinezë të parkuar njëri pas tjetrit dhe më i gjatë se një balenë blu. Me një peshë prej 27 tonësh, ai i përgjigjet afërsisht tetë apo nëntë elefantëve aziatikë.

Dinosauri, i përshkruar në një studim të botuar në revistën Scientific Reports, u identifikua nga eshtra të gjetura pranë një pellgu në verilindje të Tajlandës rreth 10 vjet më parë.

Një muze në Tajlandë po ekspozon një model të rindërtuar të tij, aq të madh sa bishti i është detyruar të përkulet për të hyrë në sallë.

Studimi u drejtua nga ekipe kërkimore nga UCL, Universiteti Mahasarakham, Universiteti i Teknologjisë Suranaree dhe Muzeu Sirindhorn në Tajlandë.

Sita Manitkoon, studiues në Universitetin Mahasarakham, tha:

“Përmasa e tij është ajo që e bën kaq interesante. Edhe pse nuk gjetëm shumë eshtra, gjetëm pjesët kryesore, si këmbët e përparme dhe të pasme, të cilat i përdorëm për të llogaritur madhësinë e tij”.

Duke pasur një madhësi dhe peshë kaq mbresëlënëse, studiuesit mund të nxjerrin disa supozime për sjelljen e tij.

Thitiwoot (Perth) Sethapanichsakul, student doktorature në UCL Earth Sciences dhe autor kryesor, tha:

“Ai do ta kalonte shumicën e kohës duke u ushqyer me gjethet në majat e pemëve. Në madhësinë e tij maksimale prej 27 tonësh, do të kishte shumë pak për t’u shqetësuar sa i përket grabitqarëve. Ne dimë për një grabitqar relativisht të madh që jetonte pranë tij, por ishte vetëm rreth tre deri në katër ton, kështu që ishte shumë më i vogël krahasuar me këtë gjigant”.

Muzeu gjithashtu ekspozon një rindërtim të zemrës gjigante të Nagatitanit.

Procesi i identifikimit të Nagatitanit ka zgjatur rreth 10 vjet dhe ka përfshirë ekipe nga UCL në Mbretërinë e Bashkuar dhe Tajlandë, si dhe bashkëpunim me Muzeun e Historisë Natyrore në Londër.

Sita Manitkoon shtoi se zbulimi filloi me kockat e legenit dhe një brinjë dy metra:

“Më pas u gjet edhe kocka e pjesës së sipërme të këmbës së përparme, rreth 178 centimetra e gjatë… Edhe më emocionuese, rreth dy vite më parë, gjetëm edhe kockën e pjesës së sipërme të këmbës së pasme”.

Tajlanda është një vend shumë i pasur me zbulime dinosaurësh, duke u renditur e treta në Azi.

Dhe për vizitorët kuriozë, rindërtimi në përmasa reale në Bangkok jep një ide të krijesave që dikur kanë jetuar në këtë rajon, shkruan AP, përcjell KosovaPress.