Ministri i Punëve të Brendshme, Xhelal Sveçla, ka deklaruar se institucionet e sigurisë po vazhdojnë pa ndërprerje luftën kundër çdo forme të organizimit kriminal dhe terrorist në vend.

Sveçla bëri të ditur se sërish, në dy lokacione në komunën e Zubin Potokut u gjet armatim, granata dore dhe pajisje të tjera ushtarake.

“Beteja kundër çdo celule terroriste nuk ndalet. Si dje, edhe sot”, shkruan Sveçla në Facebook.

Sipas tij, aksionet e fundit në terren kanë rezultuar me zbulimin e armatimit dhe pajisjeve ushtarake në veri të vendit. “Sërish, në dy lokacione në komunën e Zubin Potokut u gjet armatim, granata dore dhe pajisje të tjera ushtarake”, ka bërë të ditur ministri.

Sveçla ka nënvizuar se institucionet janë të përkushtuara për të garantuar rendin dhe ligjin në çdo cep të territorit të Kosovës. “Nga kushtetutshmëria cep më cep, te kontrolli pëllëmbë për pëllëmbë”, është shprehur ai.

Ai ka shtuar se operacionet do të vazhdojnë deri në eliminimin e plotë të elementeve kriminale. “Nuk do të ndalemi deri në çrrënjosjen totale të secilit element kriminal”, ka përfunduar Sveçla.

/Kosovapress/