Bashkimi Evropian ka burime energjie vendase, energji të rinovueshme dhe energji bërthamore. Çmimet e tyre kanë mbetur të pandryshuara për dhjetë ditët e fundit deklaroi presidentja e Komisionit të BE-së, Ursula von der Leyen në seancën plenare të Parlamentit Evropian.

‘’Megjithatë, në krizën aktuale, ka nga ata që argumentojnë se duhet ta braktisim strategjinë tonë afatgjatë dhe madje të kthehemi te lëndët djegëse fosile ruse. Ky do të ishte një gabim strategjik. Do të na bënte më të varur, më të prekshëm dhe më të dobët”, shtoi Ursula von der Leyen, transmeton ATSH.