Viti 2025 ka nisë me lajme jo të mira për qytetarët e vendit sa i përket çmimeve. Sipas Agjencisë së Statistikave të Kosovës, çmimet e konsumit janë ngritur prej 1,5 për qind në muajin janar 2025, krahasuar me muajin janar të vitit të kaluar. Derisa, norma e inflacionit mujor ishte 0,7 për qind në muajin janar 2025.
Sipas ASK-së rritja e çmimeve është ndikuar kryesisht nga disa kategori kryesore të konsumit.
“Kjo kryesisht është shpjeguar me ngritjen e çmimeve të konsumit: perimet 5,2%, energjia elektrike 2,8%, duhani 2,5%, karburantet dhe lubrifikantët për pajisjet e transportit personal 2,3%, kafja, çaji dhe kakao 1,9%, mishi 1,8%, pemët 1,7%, lëndët djegëse të ngurta, dru zjarri, pelet etj. 1,0% dhe qumështi, djathi dhe vezët (0,6%) dhe me një ndikim të përbashkët të këtyre nëngrupeve prej 0,8 për qind në IHÇK-it", thuhet në raportin e ASK-së.
Në krahasim me janarin e vitit të kaluar, çmimet janë rritur ndjeshëm për disa kategori të mallrave dhe shërbimeve.Po ashtu, çmime më të larta janë regjistruar për pijet joalkoolike, gazetat dhe materialet për zyra, shërbimet financiare, mishi dhe produktet e qumështit.
“Kjo kryesisht është shpjeguar me ngritjen e çmimeve të konsumit: kafja, çaji dhe kakao 14,6%, vajrat dhe yndyrat 8,3%, shërbime të tjera në lidhje me pajisjet personale të transportit 7,6%, uji mineral, pijet joalkoolike, lëngjet nga pemët dhe perimet 6,1%, gazetat, librat dhe materialet për zyra 5,4%, shërbimet financiare 5,2%, qelqurinat, takëmet dhe mjetet e kuzhinës 5,1%, mishi 4,6%, mallrat dhe shërbimet për mirëmbajtjen e zakonshme të ekonomisë shtëpiake 4,0%, pijet alkoolike 3,9%, qumështi, djathi dhe vezët 3,0%, veshje 2,9%, duhani 2,9%, perimet 2,5%, kujdesi personal 2,5%, buka dhe drithërat 2,1% dhe shërbimet hoteliere 2,1% me një ndikim të përbashkët të këtyre nëngrupeve prej 2,1 për qind në IHÇK-it", njofton ASK.
Ditë më parë, qytetarë të shumtë i janë bashkuar iniciativës për bojkotimin e supermarketeve si rrjedhojë e rritjes së vazhdueshme të çmimeve në Kosovë.
