Disa të mbijetuar japonezë të sulmeve me bomba atomike ndaj vendit të tyre, më 1945, kanë dërguar letra në ambasadat e SHBA-së dhe Izraelit në Tokio, duke kërkuar nga shtetet në fjalë të ndalin sulmet e tyre ndaj Iranit.

Megjithatë, Ambasada izraelite në Tokio refuzoi të pranonte letrën e bashkë nënshkruar nga katër grupe të të mbijetuarve të bombës atomike, sipas gazetës japoneze The Mainichi, përcjellë AP, transmeton KosovaPress.

“Dokumenti u kthye mbrapsht pa u lexuar fare. Mendoj se ata po bëhen mendjengushtë”, tha Shigemitsu Tanaka, 85-vjeçar, kryetar i Këshillit të të Mbijetuarve të Bombës Atomike të Nagasakit.

Letra, e cila bënte thirrje për armëpushim të menjëhershëm dhe i quante sulmet si të papranueshme, u dërgua më herët këtë muaj.

Demonstrues japonezë protestuan gjithashtu kundër luftës SHBA-Izrael ndaj Iranit në Tokio të dielën, në një protestë me titull “Lëshoni bas, jo bomba”, njofton gazeta “The Mainichi”.

Video dhe fotografi të publikuara nga organizatorët Protest Rave në rrjetin social X tregojnë protestues që mbanin pankarta dhe flamuj me slogane si “Lufta mbaron nëse ti e do”, “Jo luftë”, “Jo racizëm” dhe të tjera.

Ndërkohë, Ambasada e Iranit në Japoni njoftoi të dielën se një grup banorësh iranianë dhe qytetarësh japonezë u mblodhën jashtë ambasadës për të përkujtuar mbi 165 nxënëse të vrara në një sulm ajror në qytetin Minab, më 28 shkurt, kur SHBA-ja dhe Izraeli nisën sulmet e tyre të përbashkëta.