Vëllai i Liridona Ademaj, Leonard Ademaj tha se vendimi me burgim të përjetshëm për Naim Murselin, Granit Plavën dhe më 30 vite burgim për Kushtrim Kokallën nuk shkon vetëm për familjen, por edhe për motrën e tij të ndjerë dhe fëmijët e saj.

Pas seancës së sotme ku trupi gjykues i shpalli fajtor Naim Murselin, Granit Plavën dhe Kushtrim Kokallën për vrasjen e Liridona Ademaj, vëllai i saj Leonardi tha se dënimi i shqiptuar sot është mësim për të tjerët që krijojnë mundësi për krime të tilla.

Ai deklaroi para mediave se sot u vërtetua ajo që kanë thënë nga fillimi se vrasja e motës së tyre ka qenë e organizuar.

“Ajo se çfarë u vërtetua sot është ajo që e kemi thënë që nga fillimi, se Naimi së bashku me Kushtrimin, duke e zgjedhur Granitin si vrasës, e kanë organizuar këtë krim. Ky vendim sot nuk shkon vetëm për ne, shkon për Liridonën, shkon dhe për fëmijët e saj, të cilët nuk do ta shohin më nënën e tyre përjetësisht. Andaj, ky dënim duhet të jetë edhe një mësim për të gjithë ata, të cilët mundohen apo krijojnë mundësi që ta bëjnë një krim të tillë”, tha ai.

Vëllai i të ndjerës Liridona tha se vendimi i sotëm sadopak ua lehtëson dhimbjen familjes.

“Sado pak na ka lehtësuar dhimbjen edhe neve, edhe familjes, e po besoj që ishte një vendim të cilin e kemi pritur të gjithë populli shqiptar, jo vetëm ne familja”, tha ai.

Ndërsa, avokati i familjes Ademaj, Leotrim Syla tha se vendimin e shkallës së parë për të akuzuarin Kushtrim Kokalla do ta apelojnë në Gjykatën e Apelit.

Syla tha se sot drejtësia foli dhe nxori vendim konform provave materiale.

“Sot drejtësia foli. Sot u nxor një vendim konform prova materiale që janë administruar në shqyrtim gjyqësor. U shqiptuan dy dënime me burgim të përjetshëm dhe një kuazi-dënim me burgim të përjetshëm, edhe pse si i tillë nuk parashihet me kod, pasi që ishte vetëm në kohëzgjatje prej 30 vitesh. Por që duke pasur të drejtën që ta apelojmë edhe në Gjykatën e Apelit konform lartësisë së dënimit, konsiderojmë që do të bëjmë edhe ankesë. Sido që të jetë ka qenë një proces i ngarkuar. Kuptojmë edhe gjykatën për këtë vendim. Duhet të jemi të matur dhe të respektojmë vendimet e gjykatës, t'i pranojmë si të tilla dhe të ushtrojmë mjetet juridike që kemi në dispozicion”, tha ai.

Lidhur me prezencën e hetuesve në seancën e sotme avokati Syla tha se kjo është normale pasi janë pjesë e prokurorisë.

“Është normale që prokuroria të thërrasë gjithë ekipin hetues në një shpallje të vendimit. Siç e patë, edhe në anën e prokurorisë ishin prezentë bashkëpunëtori profesional, zyrtari ligjor i prokurorisë, përkthyesi nga gjuha serbe dhe zyrtarë të tjerë nga prokuroria. Hetuesit në këtë rast janë pjesë e stafit të prokurorisë dhe konsiderohen si të tillë. Të njëjtit kanë dashur që të shohin edhe frytet e punës së tyre të palodhshme, të cilët në orët e para pas vrasjes, mos të themi në orët e para, në momentet e para, janë përgjigjur me gatishmëri maksimale, ku kanë qenë aq të aftë dhe aq reflektues ndaj rastit, saqë një rast i cili është lajmëruar dhe i mbuluar me këllëfin e grabitjes, e kanë kthyer menjëherë dhe e kanë vërtetuar që nuk ka qenë grabitje, por ka qenë vrasje e rëndë”, tha ai.

Gjykata Themelore e Prishtinës sot i ka dënuar me burgim të përjetshëm Naim Murselin dhe Granit Plavën, ndërsa Kushtrim Kokallën e ka dënuar me 30 vite burgim.

Që të tre sot u shpallën  fajtor për vrasjen e Liridona Ademaj, që ndodhi në fund të nëntorit 2023. /B.Ibishi/

/Kosovapress/