Irani mohon të ketë kryer sulm me dron ndaj Azerbajxhanit, pas raportimeve se dy dronë nga drejtimi i Iranit ranë pranë aeroportit në enklavën azerbajxhanase të Naxhçivanit.

Në një deklaratë të publikuar nga agjencia gjysmëzyrtare iraniane Tasnim, sipas The Guardian, Shtabi i Përgjithshëm i Forcave të Armatosura tha: “Republika Islamike e Iranit mohon se forcat e saj të armatosura kanë nisur ndonjë dron drejt Republikës së Azerbajxhanit”.

Teherani fajësoi Izraelin për incidentin, duke theksuar: “Veprime të tilla nga regjimi zionist për të prishur marrëdhëniet midis vendeve myslimane me mjete të ndryshme janë të dokumentuara mirë”.

Nga ana tjetër, Azerbajxhani e vendosi përgjegjësinë tek Irani dhe paralajmëroi se sulmi nuk do të mbetet i pambrojtur, shkruan The Guardian, transmeton KosovaPress.

Ministria e mbrojtjes e vendit tha në një deklaratë: “Republika Islamike e Iranit mban përgjegjësinë e plotë për këtë incident. Këto veprime agresive nuk do të mbeten pa përgjigje”.

Ministria shtoi se do të “përgatitë masat e nevojshme hakmarrëse” pa dhënë detaje, dhe se do të hetojë llojet e dronëve që u përdorën në Naxhçivan, pranë kufirit me Iranin, ku katër persona u lënduan.

Zëvendësministri iranian i Jashtëm, Kazem Gharibabadi, i tha medias azerbajxhanase AneëZ se Teherani “nuk ka synuar vendet fqinj” dhe mohoi çdo përfshirje të drejtpërdrejtë ndaj Naxhçivanit.