Presidenti amerikan Donald Trump, bën të ditur se ka hequr dorë nga ‘kërcënimi’ për një tarifë 20 për qind për trafikun detar, vetëm pak orë pas paralajmërimeve të forta për një bllokadë të plotë.

Trump në një postim në rrjetin social, tha se Ngushtica e Hormuzit mbetet e hapur për të gjithë trafikun detar, me përjashtim të anijeve iraniane.

Ai e justifikoi këtë vendim me “udhëheqjen gënjeshtare, të dhunshme dhe keqdashëse të Iranit”, e cila sipas tij po e çon vendin drejt “shkatërrimit total”.

“Ngushtica e Hormuzit është e hapur për të gjithë trafikun e anijeve, përveç Iranit — dhe kjo është për shkak të udhëheqjes së tyre gënjeshtare, të dhunshme, keqdashëse, e cila po i çon ata në rrugën e shkatërrimit total”, shkruan Donald Trump në Truth Social.

Presidenti i SHBA-së, njoftoi po ashtu se po zëvendëson tarifën e propozuar 20% me marrëveshje tregtie dhe investimesh me vendet e Gjirit Persik. Ky ndryshim vjen pas kritikave të forta ndërkombëtare dhe shqetësimeve për ndikimin në çmimet globale të naftës, pasi Ngushtica e Hormuzit transporton rreth 20% të tregtisë botërore të naftës.

Vendimi fillestar i Trump për një tarifë 20% dhe bllokadë ndaj anijeve iraniane erdhi pas sulmeve iraniane me raketa ndaj tankereve të flamurit të Emirateve të Bashkuara Arabe në ujërat e Omanit. Sulmet shkaktuan viktima, përfshirë një marinar indian të vrarë dhe të plagosur të tjerë.

Forcat amerikane kryen goditje të synuara ndaj objektivave iraniane, duke përfshirë site raketash, drone dhe mbrojtje bregdetare në zona si Bushehr dhe Bandar Abbas.

Trump e kishte pozicionuar SHBA-në si “rojtarin e Ngushticës së Hormuzit” dhe kishte paralajmëruar pagesa nga vendet e Gjirit për mbrojtje.