Presidenti i Shteteve të Bashkuara të Amerikës, Donald Trump, ka paralajmëruar rritjen e tarifave në 25 për qind për makinat dhe kamionët që importohen nga Bashkimi Evropian.

Ai ka bërë të ditur se ky vendim vjen si pasojë e, siç ka thënë, mosrespektimit të marrëveshjes tregtare nga ana e BE-së.

“Javën e ardhshme do të rris tarifat për Bashkimin Evropian për makinat dhe kamionët që hyjnë në Shtetet e Bashkuara. Tarifa do të rritet në 25%”, ka deklaruar Trump në Truth Social, transmeton KosovaPress.

Presidenti amerikan shtoi se megjithatë, nuk do të ketë tarifa për kompanitë nga vendet e BE-së që prodhojnë automjete brenda territorit të SHBA-së.

Sipas tij, aktualisht janë duke u ndërtuar shumë fabrika të reja të automobilave dhe kamionëve në Shtetet e Bashkuara, me investime që tejkalojnë 100 miliardë dollarë, duke e cilësuar këtë si një rekord në historinë e industrisë.

Trump ka shtuar se këto fabrika pritet të hapen së shpejti dhe ato, sipas tij, do të punësojnë punëtorë amerikanë, duke e përshkruar situatën aktuale ekonomike në vendin e tij si të paprecedentë, për të mirë.

/Kosovapress/