Qendrat e votimit në zgjedhjet lokale në Turqi, ku më shumë se 61 milionë votues zgjodhën kandidatë nga 34 parti politike, u mbyllën në orën 17:00. Votimi u karakterizua nga dhuna, ku tre persona humbën jetën dhe disa u plagosën. Rezultatet e para të votimit priten në mbrëmjen e hershme. Një person ka mbetur i vrarë dhe 11 të plagosur nga një konflikt me armë, shkopinj dhe gurë në juglindje të vendit. Në një tjetër incident, një person u vra dhe katër u plagosën në përleshje, raportoi Anadolly. Përleshje shpërthyen edhe në Sanliurfa, ku 16 persona u plagosën, ndërsa një person u godit me thikë në Afyonkarahisar në perëndim të vendit.

Media Demiroren raportoi se një person ka mbetur i vrarë dhe dy të plagosur gjatë natës në Bursa. Qytetarët turq zgjodhën sot kryetarët e bashkive, kryetarët e qarkut dhe zyrtarë të tjerë lokalë që do të mbajnë poste për pesë vitet e ardhshme, duke përfshirë liderët në Stamboll, Ankara dhe Izmir, njoftoi transmetuesi shtetëror turk TRT. Partitë kryesore konkurruese janë Partia për Drejtësi dhe Zhvillim (AK), opozita kryesore Partia Popullore Republikane (CHP), Partia e Lëvizjes Nacionaliste (MHP), Partia e Mirë dhe Partia Demokratike Popullore (Partia DEM). Presidenti Recep Tayyip Erdogan po përpiqet të rimarrë kontrollin e Stambollit nga rivali i tij kryesor Ekrem Imamoglu dhe të konsolidojë më tej pozicionin e tij politik. Në vitin 2019, kryebashkiaku i Stambollit Imamoglu i dha Erdoganit dhe Partisë së tij AK goditjen më të madhe elektorale në sundimin e tij 20-vjeçar të Turqisë dhe zgjedhjet e sotme mund të forcojnë kontrollin e Erdogan në vend ose të sinjalizojnë ndryshime, pasi fitorja e Imamoglu në Stamboll do të forconte pritjet se ai do të bëhet një udhëheqës kombëtar i ardhshëm. Sondazhet parazgjedhore parashikuan një garë të ngushtë në Stamboll, qyteti me 16 milionë banorë që fuqizon ekonominë e Turqisë, duke vënë përballë Imamoglun kundër kandidatit të Partisë AK të Erdoganit, ish-ministrit Murat Kurum. Opozita fitoi zgjedhjet e 2019 në të dy qytetet.