Kryeministri i Serbisë, Millosh Vuçeviq, ka dhënë dorëheqje nga posti i tij shkaku i protestave për tragjedinë në Novi Sad.

Vuçeviq në një konferencë të jashtëzakonshme për gazetarët në Beograd, tha se këtë vendim ia ka pranuar presidenti Aleksandar Vuçiq derisa tha se beson që politika që ai përfaqëson duhet të demonstrojë nivelin më të lartë të përgjegjësisë dhe të futë norma të reja në politikën serbe, duke dëshmuar se është e përgjegjshme.

“Mendoj se politika së cilës i përkas, partia që unë drejtoj, e cila ka fituar të gjitha zgjedhjet, duhet të tregojë përgjegjësinë më të madhe dhe të demonstrojë ligje të reja, duhet të tregojë se është objektivisht më e përgjegjshmja. Ndaj, pas kësaj ngjarjeje në Asamblenë Kombëtare, është vendimi im i parevokueshëm të jap dorëheqjen. Unë pata një bisedë të gjatë me presidentin këtë mëngjes, ai pranoi vendimin tim, argumentet e mia. Le të kthehen të gjithë në bisedë dhe të kërkojnë zgjidhjen më të mirë. Është e papranueshme që dikush të sulmojë dikë tjetër, është absolutisht e papranueshme që ju të sulmoni ambientet e SNS”, tha ai.

Ai tha se qeveria ka treguar përgjegjësi dhe se doli se nuk ka njerëz të mbrojtur apo të privilegjuar.

“Jam shumë krenar për gjithçka që kemi bërë si qeveri në nëntë muajt e fundit, duke çuar në suksesin historik të vendit duke marrë një vlerësim të notës investuese, duke rivendosur korridorin e inflacionit, duke pasur rritjen e dytë më të madhe ekonomike në Evropë dhe duke mundësuar rritje të pagave dhe pensioneve. Ajo që hodhi hije ishte tragjedia e madhe në Novi Sad dhe që nga ai moment Serbia dukej se ishte ngecur në atë fatkeqësi. Fatkeqësisht, kemi parë edhe një herë abuzime politike të tragjedisë. Edhe këtu qeveria ka treguar përgjegjësi. Doli se nuk ka njerëz të mbrojtur apo të privilegjuar. Ne, si qeveri, u përpoqëm të publikojmë të gjitha dokumentet që ata kërkuan”, thotë Vuçeviq.

Vuçeviq tha se kanë plotësuar kërkesat e protestuesve, derisa ka apeluar që të gjithë ti qetësojnë emocionet e tyre.

“I uroj Presidentit të Republikës suksese në drejtimin e vendit. Sigurisht që do të kryej funksionin tim deri në zgjedhjen e qeverisë së re, pasi e gjithë qeveria aktualisht është në një mandat teknik”, shtoi ai.