Transmetuesi britanik publik, BBC, ka kërkuar nga një gjykatë në Florida të hedhë poshtë padinë e presidentit amerikan Donald Trump, e cila kërkon kompensim miliardësh për redaktimin e një episodi Panorama që përzien pjesë të ndryshme të një fjalimi të tij.

BBC argumenton se programi nuk është transmetuar në SHBA, përfshirë Florida-n, dhe se gjykata nuk ka juridiksion mbi korporatën.

Trump akuzon BBC-në për shpifje, duke thënë se redaktimi e bëri të dukej se ai kishte nxitur mbështetësit e tij të sulmonin Kapitolin më 6 janar 2021.

Në program u përdor një klip që përziente dy pjesë të ndryshme të fjalimit të presidentit, duke e bërë të dukej se ai tha: “Do të shkojmë tek Kapitoli… dhe unë do të jem atje me ju. Dhe ne luftojmë. Luftojmë si ferri”. Pjesa e dytë e fjalisë ishte thënë 50 minuta më pas.

BBC ka kërkuar hedhjen poshtë të padisë, duke theksuar se asnjë transmetues i tretë nuk e ka dhënë dokumentarin në SHBA dhe se nuk ka pasur qëllim keqdashës, ndërsa Trump u rizgjodh pak pas transmetimit.

Redaktimi i Panorama-s shkaktoi kritika një vit më vonë dhe solli dorëheqjen e drejtorit të përgjithshëm të BBC-së, Tim Davie, dhe kreut të lajmeve, Deborah Turness. Gjykatësi i Floridës ka refuzuar kërkesën e BBC-së për shtyrjen e fazës së hetimit, dhe një datë e mundshme gjyqi është parashikuar për vitin 2027.

/Kosovapress/