Ndeshja e skuadrave nga mesi i tabelës në Premier Ligë ndërmjet Manchester United dhe Tottenham përfundoi me fitoren e mysafirëve - 0:3.
Nikoqirët hyrën në fushë me tetë pikë prapa liderit Liverpool, pas dy humbjeve nga pesë ndeshjet e fillimit të edicionit të ri të garave dhe përballja me Tottenham ishte një mundësi për të rikthyer skuadrën në “binarë”.
Megjithatë, ndeshja në “Old Trafford” nisi me “dush” të ftohtë për “Djajtë e kuq”, pas golit të pësuar qysh në minutën e tretë nga Brennan Johnson.
Pësimi i golit të papritur i bëri më agresivë të përzgjedhurit e Erik ten Hag në fushë, duke bërë ndërhyrje të ashpra ndaj lojtarëve kundërshtarë, për të cilën gjë mesfushori Bruno Fernandes u ndëshkua me kartonin e kuq në minutën e 42-të, duke e lënë kështu skuadrën në telashe me një lojtar më pak në vazhdim.
Në pjesën e dytë, Tottenham shfrytëzoi epërsinë në fushë duke shënuar përmes Dejan Kulusevski në minutën e 47-të, i cili regjistroi golin e tij të parë personal në Premier Ligë, teksa fitoren bindëse e vulosi Dominic Solanke në minutën e 77-të për epilogun - 0:3.
Kjo është fitorja e tretë e Tottenham në gjashtë ndeshje, duke zënë pozitën e tetë në tabelë me 10 pikë, teksa “Djajtë e Kuq” mbeten me 7 pikë në vendin e 12-të, por të cilin mund ta humbin nëse Bournemouth shënon fitore në përballje nesër si vendës me Southamptonin e renditur në pozitën e parafundit.
Në ndeshjen tjetër të xhiros së gjashtë sot të Premier Ligës, skuadrat Ipswich Town dhe Aston Villa u ndan në paqe duke luajtur baras - 2:2.
Kujtojmë, në tabelë kryeson Liverpool me 15 pikë, pasuar nga Manchester City e Arsenal me nga një pikë më pak.