Një tërmet në det me magnitudë 7.8 ballë goditi të hënën jugun e Filipineve, duke lënë të paktën 35 persona të vdekur dhe mbi 200 të plagosur, kryesisht si pasojë e shembjes së ndërtesave.

Dridhjet shkaktuan gjithashtu një cunami me lartësi rreth një metër, i cili goditi brigjet përreth.

Disa objekte, kryesisht me pak kate, u shembën ose pësuan dëme të rënda në qytetin General Santos, i cili ishte ndër zonat më të prekura.

“Kamioneta jonë papritur u drodh fort dhe mendova se na ishte shpuar goma”, tha për Associated Press Rod Sosmeña, drejtor rajonal i Zyrës së Mbrojtjes Civile, i cili po udhëtonte në General Santos kur tërmeti goditi në orën 07:37 të mëngjesit. “Lëkundjet ishin shumë të forta dhe njerëzit dolën me vrap nga shtëpitë drejt rrugëve”, shtoi ai, përcjellë KosovaPress.

Valë më të vogla të dridhjeve u regjistruan edhe në Indonezi, Palau dhe deri në jug të Japonisë.

Tërmeti shkaktoi gjithashtu një rrëshqitje dheu në Glan, një komunë në provincën Sarangani, ku humbën jetën 13 banorë. Katër persona të tjerë vdiqën në pjesë të tjera të kësaj zone.

Drejtori i Institutit Filipinas të Vullkanologjisë dhe Sizmologjisë, Teresito Bacolcol, tha se ky ishte tërmeti më i fuqishëm që ka goditur Filipinet gjatë këtij viti. Ai u bëri thirrje qytetarëve të kërkojnë këshilla nga autoritetet përpara se të kthehen në ndërtesat dhe shtëpitë e dëmtuara, pasi ato mund të shemben nga pasgoditjet.

Shtetet e Bashkuara, aleate të Filipineve në bazë të një traktati dypalësh, njoftuan se po koordinohen me autoritetet në kryeqytetin Manila dhe janë të gatshme të mbështesin përpjekjet për menaxhimin e situatës. Mbështetje shprehën gjithashtu Franca, Japonia dhe Zelanda e Re.