Mes përplasjeve të ashpra dhe tensioneve ka kaluar seanca e jashtëzakonshme e Kuvendit për energjinë elektrike, raporton KosovaPress.

Deputetja e LDK-së, Hykmete Bajrami dhe deputeti i LVV-së, Ejup Ahmeti, kanë adresuar akuza ndaj njëri-tjetrit për dallavere në këtë sektor.

Bajrami tha se mafia energjetike është fakt në qeverinë Kurti, madje përmendi edhe deputetin e LVV-së, Ejup Ahmeti, që është partner biznesi me një kompani që po fiton miliona euro në tregti të energjisë.

“Mafia energjetike është fakt. Nuk jeni dalë me demantu asnjëherë, lidhjet e juaja me njerëz që janë të lidhur me tregtarë të energjisë janë fakte. Shefi i kabinetit të kryeministrit të Kosovës hap kompani për tregti të energjisë elektrike”, tha ajo.

Mirëpo, deputeti i LVV-së, Ahmeti, tha se pretendimet e deputetes së LDK-së janë të pavërteta. Ndërkaq tha se zyrtarë të lartë të LDK-së, madje edhe kryetari Lumir Abdixhiku, janë të përfshirë në tregti me energjinë elektrike.

Madje ai tha se edhe bashkëshorti i deputetes Hykmete Bajrami është pronar i një kompanie farmaceutike në Kosovë.

“Kjo nuk është e vërtetë. Për çdo gjë të konsultoheni me kolegët e juaj nga LDK-ja që kanë një lidhje të shkurt me personin që po flisni ju. E dyta, baxhanaku i Lumir Abdixhikut, kryetarit tuaj, Besart Bajraktari, tregoni mirë qytetarëve se sa tenderë i merr ky. Po ashtu kompania e baballakut të kryetarit Abdixhiku, edhe gruaja e Lumir Abdixhikut ka themeluar kompani për tregtimin e energjisë. E treta, tregoni qytetarëve se burri juaj është pronar i një kompanie farmaceutike e këndej flisni për shëndetësinë”, tha ai.

Deputetit të mazhorancës i reagoi deputetja e LDK-së, Hykmete Bajrami, e cila mohoi se bashkëshorti i saj është pronar i ndonjë kompanie farmaceutike.

Pas përfundimit të fjalës së saj, ajo i shkoi në vendin e deputetit të LVV-së, ku i kërkoi atij që këto pretendime t’i fliste jashtë hapësirës së seancës plenare, ku deputetët nuk kanë imunitet.

“Kërkoj prej teje me dal para mediave në oborr të Kuvendit dhe me thënë këtë deklaratë që e the. As unë dhe as burri im dhe asnjë anëtar i familjes së gjerë nuk ka lidhje me asnjë kompani farmaceutike. Ti asnjë fjalë nuk e the që je bashkëpronar me Marin Gjonaj që po bën ‘gërdi’ me tregun e energjisë elektrike. Plus fole për lidhje të shkurta por nuk përmende emra”, tha ajo.

Në debat u përfshi edhe kryetarja e Kuvendit, Albuelena Haxhiu, e cila i kërkoi disa herë deputetes Bajrami të ulet në vendin e vet, pasi sjelljet e saj janë të papranueshme.

“Deputete Hykmete Bajrami, uluni në vend. Deputete, këto sjellje janë të papranueshme në seancën e Kuvendit, dhe këto sjellje janë të papranueshme”, tha ajo. /KosovaPress/

/Kosovapress/