Shefi i grupit i parlamentar të Partisë Demokratike të Kosovës, Arian Tahiri deklaroi se çështja e presidentit nuk është betejë politike, ndonëse, sipas tij, Albin Kurti në vazhdimësi ka prodhuar drama.

Lidhur me pjesëmarrjen e kësaj partie në seancë, Tahiri deklaroi se qëndrimi i tyre dihet tash e pesë ditë.

Deputeti i PDK-së, Arian Tahiri tha se për liderin e PDK-së, Bedri Hamza nuk ka qenë e lehtë t’i përgjigjet ftesës së Albin Kurtit, i cili, siç tha ai, ka përdorur gjuhë fyese.

“Nuk është kjo betejë politike sepse nuk e kemi vlerësuar si betejë politike pavarësisht se kemi thënë se ai është duke prodhuar drama në vazhdimësi si rezultat i dramave të tij jemi sonte këtu pa president dhe  jemi të cenuar me pas tendencë me u thye rendi kushtetues”, theksoi ai.

Tashmë kur kanë mbetur më pak se tri orë për të përfunduar afati kushtetues për zgjedhjen e shefit të shtetit, Tahiri tha se Kurti me strategjinë dhe veprimet e tij ka pamundësua që vendit sonte të ketë presidentin.

“Ka qenë imponim dhe rrugë e fortë që ne e kemi alarmuar në vazhdimësi që Kurti me strategjinë,  energjinë e tij dhe veprimet  e tij që i ka bërë pas datës 28 dhjetor sepse ne e kemi ditur që mandati përfundon në muajin marsin ka qenë në formën ta pamundësoj që kjo legjislaturë me arritur shumicën dhe vendi ta ketë presidentin”, tha ai. /B.Ibishi/

/Kosovapress/