Shefi i grupit parlamentar të Aleancës për Ardhmërinë e Kosovës (AAK), Besnik Tahiri, ka reaguar lidhur me vendimin e Qeverisë për themelimin e Këshillit të Ministrave për Reformën e Administratës Publike, duke e cilësuar atë si një hap të gabuar dhe devijim nga parimet bazë të qeverisjes.

Në një postim në Facebook, ai ka shkruar se përgjegjësia për reformën e Administratës Publike duhet të ketë një adresë të qartë, konkretisht në Ministrinë e Digjitalizimit dhe Administratës Publike.

Tahiri ka propozuar forcimin e rolit të ministrisë përkatëse, duke e cilësuar rithmelimin e saj si hap pozitiv, por ka paralajmëruar se vendimi i fundit “po e zbeh dhe shpërndan përgjegjësinë. Kjo nuk është reformë, por regres. Nuk kemi më një adresë të qartë përgjegjësie, por një trup kolegjial ku përgjegjësia humbet dhe llogaridhënia zbehet. Që në start po projektohet dështimi dhe nënvlerësimi i një ministrie kyçe për shtetin.  Reforma nuk mund të fillojë mbrapsht”, shtoi Tahiri.