Gjykata Themelore në Gjakovë i ka caktuar një muaj paraburgim një të pandehuri i cili dyshohet se ka kryer sulm seksual nga vajzës së tij, më 1 prill.

“Sipas kërkesës së Prokurorisë,  ndër të tjera ceket se me datën 1 prill 2026, i pandehuri dyshohet se ka vepruar në mënyrë të papërshtatshme dhe pa pëlqimin e të miturës – vajzës së tij, duke përdorur përmbajtje të papërshtatshme dhe duke bërë kërkesa të papranueshme. Pas incidentit, e mitura ka njoftuar prindin tjetër dhe rasti është raportuar në polici”, thuhet në një njoftim të Gjykatës Themelore të Gjakovës, transmeton KosovaPress.

Për shkak të ndjeshmërisë së çështjes dhe mbrojtjes së privatësisë së personave të përfshirë, veçanërisht të së miturës, autoritetet nuk kanë dhënë detaje shtesë.

Gjyqtari i procedurës paraprake, Drilon Haraçia, pas mbajtjes së seancës dëgjimore, ka vlerësuar se janë përmbushur kushtet ligjore për caktimin e paraburgimit ndaj të pandehurit.

Sipas vendimit të gjykatës, masa e paraburgimit do të zgjasë nga data e arrestimit, më 7 prill 2026, deri më 6 maj 2026.

Gjykata ka njoftuar se palët kanë të drejtë ankese ndaj këtij vendimi në Gjykatën e Apelit të Kosovës. /KosovaPress/

/Kosovapress/