Mbrojtësi i Kosovës, Mërgim Vojvoda, ka shprehur krenarinë për suksesin e arritur me klubin e tij, por ka theksuar se përfaqësimi i Kosovës mbetet prioriteti i tij kryesor.

Para ndeshjes së radhës së “Dardanëve”, Vojvoda tha se, nëse do t’i duhej të zgjidhte mes dy objektivave, zgjedhja e tij do të ishte pa hezitim Kosova.

“Gjithsesi, nëse më pyetni se cilën do të zgjidhja, njërën apo tjetrën, me sy mbyllur do ta zgjidhja Kosovën. Por ky është realiteti. Jam shumë i gëzuar që kemi arritur të kualifikohemi në Ligën e Kampionëve”, deklaroi ai.

Futbollisti kosovar foli edhe për zhgënjimin pas humbjes në finalen ndaj Turqisë, duke theksuar se ekipi nuk duhet të humbasë besimin pavarësisht rezultatit.

“Megjithatë, besoj se të gjithë kemi qenë shumë të mërzitur pasi e humbëm finalen këtu në shtëpi kundër Turqisë. Nuk duhet të dorëzohemi, sepse do të kemi mundësi të tjera dhe shpresoj që edhe me Kosovën të arrijmë të bëjmë diçka të madhe”, tha Mërgim Vojvoda.

Ndeshja miqësore Kosova - Andorra zhvillohet sot më 7 qershor, nga ora 20:00, në stadiumin “Fadil Vokrri” në Prishtinë.

KosovaPress