Një nga ndeshjet më të mëdha të sezonit në futbollin anglez zhvillohet sot, ku Manchester City pret Liverpoolin në çerekfinalen e Kupës FA.

Takimi luhet në stadiumin “Etihad” dhe konsiderohet si një finale e parakohshme mes dy prej skuadrave më të suksesshme në Angli gjatë viteve të fundit.

Manchester City hyn në këtë sfidë me moral të lartë pas triumfit në Kupën e Ligës, dhe synon të vazhdojë garën për një tjetër trofe këtë sezon. Ndërkohë, Liverpool ka pasur një sezon të paqëndrueshëm, sidomos në Premier League, dhe FA Cup mbetet një nga shanset e fundit për të shpëtuar sezonin. 

City ka fituar të dy përballjet direkte këtë sezon ndaj “The Reds”, duke i bërë ata favoritë për këtë ndeshje. Pep Guardiola ka disa shqetësime në mbrojtje për shkak të dëmtimeve, por në sulm skuadra është e plotë me emra si Erling Haaland dhe Jeremy Doku, derisa Liverpool pritet të rikthejë Mohamed Salah nga dëmtimi, ndërsa mungesa e portierit Alisson mbetet një problem serioz për ekipin. 

Formacionet e mundshme:

Man City (4-2-3-1): Trafford; Nunes, Khusanov, Guehi, O’Reilly; Rodri, Silva; Semenyo, Cherki, Doku; Haaland.

Liverpool (4-2-2-2): Mamardashvili; Gomez, Konate, Van Dijk, Kerkez; Gravenberch, Mac Allister; Szoboszlai, Wirtz; Salah, Ekitike.

Ndeshja zhvillohet sot më katër prill, me fillim nga ora 13:45.

KosovaPress