Mediat spanjolle, duke cituar burime policore, kanë raportuar se ka një plan për të krijuar manualin e parë konkret se si duhet vepruar në rast të rritjes së “rrezikut të luftës”, pasi Spanja bën pjesë në NATO dhe është një nga vendet që ka dhënë mbështetjen më të madhe për Ukrainën.

Siç rezulton, manuali është pjesë e Strategjisë Kombëtare të Mbrojtjes Civile, e cila u miratua nga Këshilli i Sigurisë Kombëtare më 15 tetor. Ai shqyrton për herë të parë mundësinë e një konflikti që mund të godasë Spanjën dhe qytetarët do të informohen për hapat që duhet të ndërmarrin dhe këshillat se si të mbrohen.

Kështu, Spanja i bashkohet planeve të njohura që Suedia, Norvegjia dhe Finlanda i kanë dërguar tashmë banorëve të tyre.

Publikimi i doracakut nuk do të thotë se vendi po përgatitet për luftë, por është i detyrueshëm paralajmërimi i qytetarëve për hapat që duhen ndjekur në rast të një konflikti në të ardhmen.

Domethënë, këto manuale përmbajnë këshilla, një listë artikujsh që duhen pasur dhe udhëzime se çfarë duhet bërë në rast se kriza aktuale çon në një situatë lufte që do të ndikonte drejtpërdrejt në Spanjë. Planet janë të ngjashme me ato tashmë të njohura në vendet e tjera dhe përfshijnë rekomandime për t'u siguruar njerëzve ushqime, ilaçe dhe nevoja të tjera të ngjashme që nuk prishen për një javë.

Duhet theksuar se lufta nuk është përfshirë në manuale si skenar i mundshëm në listën e fatkeqësive dhe situatave emergjente të Administratës Kombëtare të Mbrojtjes Civile.