Dy raste të ndara që lidhen me armë zjarri janë raportuar gjatë ditës së djeshme në Gjakovë, ku të dyshuarit kishin publikuar pamje në rrjete sociale.

Sipas Policisë, në rastin e parë rreth orës 13:30, një e dyshuar femër kosovare ka postuar një video-incizim në rrjetin social Snapchat, ku shihej me armë zjarri. Nga ajo është konfiskuar një armë-pistoletë me dy karikatorë të zbrazët. Me urdhër të prokurorit, pas intervistimit, e dyshuara është liruar në procedurë të rregullt.

Ndërkaq, në rastin e dytë që ka ndodhur rreth orës 11:20 në rrugën “Londra”, është intervistuar një i dyshuar mashkull kosovar, i cili kishte publikuar foto dhe video duke gjuajtur me armë zjarri. Gjatë kontrollit në shtëpinë e tij nuk është gjetur armë. Edhe në këtë rast, me vendim të prokurorit, i dyshuari është liruar në procedurë të rregullt.

Të dy rastet janë cilësuar si “Mbajtje në pronësi, kontroll ose posedim të paautorizuar të armëve” dhe “Shkaktim i rrezikut të përgjithshëm”.

/Kosovapress/