Skandal dhe turp po vlerësohet ekspozita e realizuar me mbështetje financiare nga Kuvendi i Republikës së Kosovës, e cila është vendosur në sheshet e Prishtinës. Aty ndër të tjera flitet për masakrën e burgut të Dubravës, ku ndër të tjera thuhet se prej të vrarëve 48 të burgosur shqiptarë figurojnë si të armatosur.

Derisa kjo u cilësua si shtrembërim i rënd i të vërtetës, organizatorët e ekspozitës sqaruar se janë bazuar në të dhënat e Humanitarian Law Center (HLC), organizatë e udhëhequr nga Natasha Kandiq.

Ish i burgosuri Sadik Zeqiri ka reaguar lidhur me ekspozitën “Masakrat në Kosovë 1998-1999”, e vendosur në sheshet e kryeqytetit, duke e quajtur si turp se si shtrembërohet e vërteta në sheshin e Prishtinës.

“Historia nuk është lodër që mund ta shtrembëroni me disa tabela të pasakta. A e keni parë çfarë keni shkruar për masakrën e Dubravës? Si është e mundur të pretendoni se 48 shqiptarë të armatosur dhe 58 civilë janë vrarë në Dubravë? Nga i keni marrë këto “fakte”? Në Serbi? Në Dubravë nuk ka pasur të burgosur të armatosur. Të gjithë kanë qenë duarthatë dhe të pambrojtur. E vërteta është kjo: 116 të burgosur shqiptarë janë vrarë, ndërsa ende figuron i zhdukur Ukshin Hoti. Mbi 400 të tjerë janë plagosur. Kjo nuk është thjesht gabim – është shtrembërim i rëndë i së vërtetës. Turp për këtë. Edhe një kërkim-falje nuk mjafton”, ka shkruar ai.

Ndërkohë, një sqarim e ka dhënë Shkelzen Gashi, i cili ka shkruar se në sheshin “Nëna Terezë” në Prishtinë vazhdon të jetë e hapur për publikun ekspozita “Masakrat në Kosovë 1998-1999”, e organizuar nga ADMOVERE dhe INTEGRA.

Sipas tij, kjo ekspozitë paraqet në mënyrë kronologjike 49 masakra të kryera gjatë luftës në Kosovë (1998-1999), nga gjithsej 105 masakra të evidentuara deri më tani.

“Për përpilimin e listës së të vrarëve nëpër masakra, jemi mbështetur në listën e të vrarëve nga “Libër Kujtimi i Kosovës” i Humanitarian Laë Center (HLC), organizatë e udhëhequr nga Nataša Kandić. Në libër e kemi sqaruar se në këtë listë të të vrarëve të HLC-së, për disa masakra individë të vrarë figurojnë të regjistruar si persona të armatosur, megjithëse në momentin e vrasjes ata ishin civilë të paarmatosur dhe nuk kishin rezistuar”, ka shkruar Gashi.

ADMOVERE dhe Integra kanë sqaruar se nga sot, 24 mars 2026, deri më 7 prill 2026, në sheshin “Nëna Terezë” në Prishtinë do të qëndrojë ekspozita “Masakrat në Kosovë 1998-1999”, e organizuar nga ADMOVERE dhe INTEGRA.

Në këtë ekspozitë janë paraqitur, në mënyrë kronologjike, 49 masakra të kryera gjatë luftës në Kosovë 1998–1999, duke filluar nga masakra në Likoshan-Qirez (28 shkurt 1998) e deri te masakra në Familjen Bala (12 qershor 1999). Nga 105 masakra, në këtë ekspozitë janë përfshirë vetëm ato për të cilat kemi pasur fotografi dhe citate të dëshmitarëve, ndërsa në librin “Masakrat në Kosovë 1998-1999” figurojnë të gjitha masakrat. Po ashtu, edhe në uebfaqen “Masakrat në Kosovë 1998-1999”, që do të lansohet muajin tjetër, do të figurojnë të gjitha masakrat.

Kjo ekspozitë është realizuar me mbështetje financiare nga Kuvendi i Republikës së Kosovës, EXFIS, Libraria Dukagjini, JYSK, KFC, CHwB dhe Besa-Besë.

/Kosovapress/