Forcat turke të sigurisë kryen, të martën, bastisje të gjera në Ankara, duke ndaluar më shumë se 200 persona të dyshuar për lidhje me grupe ekstremiste, përfshirë organizatën “Shteti Islamik” (ISIS).

Këto aksione u zhvilluan në prag të Samitit të NATO-s që mbahet më 7 e 8 korrik në kryeqytetin e Turqisë, e ku pritet të jetë i pranishëm edhe presidenti amerikan Donald Trump.

Turqia, siç raporton AP e transmeton KosovaPress, po planifikon masa të rrepta sigurie për samitin, përfshirë ndalimin e protestave dhe kufizimin e qasjes në rrugët që çojnë drejt aeroporteve, si dhe izolimin e zonave përreth vendit ku do të mbahet samiti dhe hoteleve ku do të qëndrojnë delegacionet.

Qeveria e presidentit turk Recep Tayyip Erdogan e ka vendosur sigurinë ndër prioritetet kryesore dhe autoritetet kryejnë rregullisht operacione të tilla. Muajin e kaluar, forcat e sigurisë ndaluan 324 persona të dyshuar për lidhje me “Shtetin Islamik” në një aksion të shtrirë në të gjithë vendin.

Herët të martën, prokurorët turq lëshuan urdhra ndalimi për 241 të dyshuar, ndërsa 209 prej tyre u arrestuan gjatë operacioneve të policisë dhe xhandarmërisë në Ankara, thuhet në një deklaratë të Zyrës së Kryeprokurorit. Bastisjet vazhduan edhe më vonë gjatë ditës për kapjen e të dyshuarve të mbetur.

Mes të arrestuarve ishin 56 persona të dyshuar si militantë të “Shtetit Islamik” dhe 35 anëtarë të Partisë/Frontit Revolucionar për Çlirimin e Popullit (DHKP-C), një grup i majtë radikal i njohur për sulme të armatosura dhe atentate në Turqi.

AP raporton se “Shteti Islamik” ka kryer gjithashtu një sërë sulmesh vdekjeprurëse në Turqi, përfshirë sulmin e natës së Vitit të Ri 2017 në një klub nate në Stamboll, ku u vranë 39 persona.