Presidentja e Kosovës, Vjosa Osmani, ka pritur në takim senatorët amerikan Chris Murphy dhe Gary Peters. Këta të fundit kanë kërkuar që Serbia të mos e pengojë Kosovën në anëtarësim në organizata ndërkombëtare.
Pas takimit, presidentja Osmani ka thënë se Kosova është vendi më pro amerikan në botë, derisa ka kritikuar Serbinë për moszbatim të marrëveshjes së Ohrit.
“Në kuadër të diskutimeve për dialogun, i njoftova senatorët për listën e gjatë të shkeljeve nga ana e Serbisë. Kjo për mua nuk është një temë e thjeshtë administrative se kush e ka listën më të gjatë të obligimeve të pazbatuara, por ka të bëjë me paqe dhe stabilitet, gjë të cilën Shtetet e Bashkuara kanë kontribuar jashtëzakonisht shumë", ka thënë Osmani.
Në anën tjetër, senatori Chris Murphy, ka thënë se aleanca e ShBA-ve me Kosovën është e fuqishme dhe jetike.
Ai ka thënë se Serbia duhet të zbatojë marrëveshjen e fundit, por edhe Kosova të konkretizojë zotimin për themelimin e Asociacionit të komunave me shumicë serbe.
"Na vjen mirë që po e shohim marrëveshjen e fundit, ndërmjet Kosovës dhe Serbisë që përfshinë njohjen e ndërsjellë të dokumenteve zyrtare, por edhe hapa të vështirë që duhet të ndërmerren nga dy palët. Serbia duhet të ndalojë të pengojë Kosovën për të qenë pjesë e organizatave ndërkombëtare. Kosova ka marrë një përkushtim edhe t’iu lejuar komunave të bëhen bashkë në një Asociacion”, ka thënë ai.
Mbështetje ndaj Kosovës ka deklaruar edhe senatori tjetër, Gary Peters.
“Do të vazhdojmë të shohim mundësitë për të forcuar mundësitë për sigurinë kibernetike, gjithashtu edhe për përmirësimin e marrëdhënieve të forcave ushtarake të ShBA-së për ndërveprueshmërinë me tërë Evropën”, ka theksuar ai.
Pas takimit me Osmanin, dy senatorët amerikan do të takojnë edhe kryeministrin Albin Kurti.
